Marcos Martínez Merino: "Yá nada ye como antes, nin siquier los supervivientes". ReMine

Alfredo González
Vienres 24, Abril de 2015, 1:04 pm

Tres veinte años en Madrid y quince trabayando en televisión (Informativos Telecinco, 12 años), decides faer la maleta y volver a Asturies, el to llugar d'orixe, cola idea fundamental de grabar el documental "ReMine, l'últimu movimientu obreru". ¿Hubo dalguna motivación concreta amás de la puramente sentimental o vindicativa?. ¿Cuánta culpa tienen los años en Telecinco y en Madrid?. ¿Construyiríes "ReMine" de nun marchar va tiempu d’equí?

Toi seguru que ReMine sería daqué bien distintu si yo nun viviera tantu tiempu fora d'Asturies. Yo nací en La Calzada, un barriu obreru marcáu pola conflictividá cuando yo yera neñu pol fin de los estelleros, Ensidesa, etc…La película surde como un realcuentru documental con un pasáu que yo tenía en parte mitificáu y que quería enseñar y reivindicar. Un pasáu que cuesta alcontrar nel presente asturianu salvu nes Cuenques mineres. La esperiencia de Madrid y la televisión, ensin dulda, tamién foi fundamental. Ente otres coses, taba bien acostumáu a lluchar contra'l reló n'informativos y a caltener l'aselu en situaciones estresantes.

Una vegada n’ Asturies instáleste ocho meses en Turón -llugar históricu y referente de la llucha minera- pa realizar "trabayu de campu". ¿Vivir en primer persona la resultancia de la reconversión yera la única manera de faelo?. Tantu na cuenca del Caudal como na del Nalón había munches opciones pa instalase y faer d'elles oxetu d'estudiu, ¿por qué precisamente Turón?

Nun podíamos cuntar la hestoria que queríamos ensin antes conocela y intentar entendela. Nun conozo otra forma meyor de sentir les coses qu'averase de forma natural y ensin mires. Tenía que ser un sitiu paradigmáticu pero tamién diba representar el mio realcuentru con Asturies tres veinte año d'asfaltu en Madrid. Turón ye un llugar guapísimu pa dir vivir cola to familia y, sobremanera, ún de los mayores paradigmes de l'agónica desapaición de la minería y representaba tamién ún de los llugares más estereotipaos de les cuenques mineres. Vivir en Turón foi determinante pa nun tener duldes que la hestoria de ReMine tenía qu'enseñar les emociones y non los acontecimientos. Foi en munchos sentíos una reconciliación cola especie humana.

¿Cuál foi la metodoloxía qu'usasti pa documentate? Antes de dir a vivir a Turón, ¿remanasti dalgún tipu de bibliografía/filmografía?

La preproducción de la película duró más d'un añu. Empezamos 4 meses antes de dir a vivir pa Turón con busca d'archivos audiovisuales nos principales fondos documentales públicos y privaos d'España, cadenes de televisión y radio en Francia, Reinu Uníu, Alemaña, etc. Lleímos cualquier bibliografía rellacionada cola minería n'Asturies, películes, etc. Yera necesariu documentase antes d'encarar l'impactu emocional pero nun foi senciellu. La memoria audiovisual de la minería ye bien escasa y ta bien tremada. A la fin, atopamos dellos documentos inéditos nes televisiones europees. Depués tuvimos 8 meses faciendo más de 150 entrevistes n'Asturies a mineros, prexubilaos, empresarios, políticos, sindicalistes, periodistes, mocedá, profesores, etc.

Dexalo tou pa venir retratar el final d'un movimientu históricu tien enforma d'heroico y arriesgao. Nestos años de trabayu, ¿sentisti la necesidá d'abandonar y buscar un trabayu convencional" en dalgún momentu?

Non, al contrariu. Nin siquier tengo claro que fuera un actu tan ventureru. Namás foi una necesidá vital. Había que camudar de vida y decidimos empezar faciendo películes documentales, vinimos a Asturies, españó la fuelga, rodamos la película, etc. Nun creo que mirar p’atrás sirva cuando la decisión tómesla personalmente, ensin nenguna influencia esterna. El trabayu y l'esfuerzu suelen tener recompensa.

En dalgún llugar lleí que "ReMine" ye una película sobre la fuelga asturlleonesa de 2012 pero'l so fundamentu vien d'antes, y la fuelga te sobrevieno cuando yá tabes trabayando sobre’l tema. ¿Podríamos dicir, siempres ente comines, que foi una suerte atopase coles movilizaciones?

Podría dicise asina anque la intuición teníemosla. Tuvi tola vida faciendo información económica y el zarru de la minería taba previstu pa 2018. Pero, de sópitu, españó una crisis económica que derrumbó parte del Estáu de Bienestar. Na nuesa hestoria recién, los mineros empecipiaron fuelgues contra los Gobiernos siempres que tuvimos retayos de derechos y llibertaes. Nun podíamos predicir la fecha pero sí que podía haber protestes nun horizonte próximu. 

¿Cambió-y a unu la vida'l vivir aquel recibimientu en Madrid a la Marcha Negra?

Supongo que sí. Tuvi en decenes de manifestaciones en Madrid de distintos colectivos o por distintes esixencies, pero nunca viera lo qu'asocedió aquella nueche del 11 de xunetu. Miles de persones salieron a la cai p’agradecer l'esfuerzu d'un grupu de 200 trabayadores que taben dando exemplu cola so protesta cuando los retayos yeren más cruentos. Foi increíble. La xente quería tocalos, abrazalos, glayalos, animalos…Otra vegada los mineros y la so mística histórica frente'l poder establecíu.

Antes de sacar a la lluz "Remine, l'últimu movimientu obreru" autoeditaste "ResistenciaMinera", un llibru con fotografíes de Javier Bauluz y un documental basáu nos 65 díes de fuelga. Colos beneficios sufragasti la post-producción d'esti postreru, ¿ye'l camín a siguir?

Nun sé si ye'l camín a siguir pero sí que nun teníamos munches alternatives. La producción de documentales n'España raspia les condiciones d'un país subdesarrolláu culturalmente. Ye bien complexu atopar financiamientu de les televisiones, ente otres coses, porque nun hai ventanes onde emitir un documental. La fortuna brindóme la compañía de Javier mientres dellos meses y, a la fin, los dos decidimos publicar un llibru-DVD pa financiar los nuesos respeutivos proyectos. La rempuesta de les cuenques foi ablucante pero nun creo qu'esa ferramienta de financiamientu funcionara igual con otra hestoria y con un públicu oxetivu distintu. “El trabayu hai que págalo”, como dicen los mineros. Volcáronse col llibru p’agradecenos el nuesu trabayu informativu mientres la protesta.

La vocación de la película ye casi más internacional que nacional, empezando pol títulu, ¿ye la llucha minera un estandarte global del movimientu obreru?. ¿La xente que viviera n'otros países interpreta la película de la mesma manera qu’equí?

La llucha minera ye un símbolu internacional que tien constantes vitales y comportamientos bien similares en tolos rincones del mundu onde esiste. Creo que les condiciones del trabayu son determinantes. La película yá pasó pel públicu arxentín, uruguayu, chilenu, mexicanu y rusu y les emociones y la comprensión de la película foi bien similar a pesar de les diferencies culturales ente unos y otros. En San Petersburgo, por casu, el públicu salía de la película tarariando Santa Bárbara Bendita o en México acaben d'unvianos una preciosa carta'l sindicatu de lletricistes amosando'l so más absolutu respaldu y empatía cola llucha minera. Los mineros representen un mitu universal del movimientu obreru. Conocíamos esa simboloxía universal y, por eso, el proyectu siempres se plantegó con vocación internacional pa enseñalo a la mayor cantidá de xente posible.

Mientres la Marcha Negra vivisti de cerca lluchar pero nel tiempu que vivisti en Turón comprobasti lo que quedó d'ella. ¿Son dos cares d'una mesma moneda?, ¿Non aterra comprobar el fracasu d'una batalla ganada?

La épica ta na llucha y non nos resultaos. Ye bien senciellu engarrase si la victoria ta asegurada. En Turón atopamos un llugar afaráu pero con un enorme arguyu minero. El Valle alienda minería a pesar de que nun queda nin un pozu abiertu. Nun creo que puedan comparase les lluches del pasáu coles actuales porque toos camudemos enforma. Los mineros tienen sobre sí una pesada llosa que-yos obliga siempres a tar al altor de les sos circunstancies históriques pero, a la fin, ye l'únicu colectivu que foi capaz d'aguantar tres meses ensin cobrar el so salariu pa reivindicar el futuru d'un estilu de vida.

¿Marcos Martínez Merín votaría que "sí" a les prexubilaciones?

Agora paez que la victoria del sí a les prexubilaciones foi atayante pero en realidá foi bastante apertada. El pasáu pudo ser bien distintu por un puñáu de votos. Siempres hai que xulgar les coses en contestu. La minería en toa Europa taba siendo esmantelada y, en dellos casos como'l británicu, direutamente estrapada. Nun me siento capaz de xulgar a un señor qu'acepta prexubilase con 42 años cuando lleva 20 años trabayando a 600 metros so tierra y vio cómo la mina mataba o amalaba a los sos antepasaos. Hai muncha hipocresía sobre l'asuntu. La inmensa mayoría de los trabayadores del estáu aceptaríen eses condiciones de retiru ensin pensar un segundu nel futuru de los sos fíos o les sos comarques pero, sicasí, a los mineros hai que condergalos porque nun tuvieren al altor de les sos circunstancies históriques cuando tienen unes condiciones llaborales infinitamente peores que'l restu de trabayadores. Yo tuvi nel interior d'una mina y sé que nun aguantaría demasiáu tiempu faciendo esi trabayu.

Últimas
Al azar

Hemeroteca

Buscador