Arte


I Festival de Cultura Urbano de Samartín

Xicu Ariza
Vienres 14, Xunetu de 2017, 3:40 am

Esti sábadu 15 celébrase en L’Entregu el “Primer Festival de Cultura Urbano de Samartín del Rei Aurelio”

L'asociación xuvenil Que Nun Apare! entama nel colexu públicu El Coto esti eventu qu’axunta deporte, danza, talleres y música

Esti añu en L’Entregu les tradicionales fiestes de La Laguna tán nel aire énte la falta de Comisión de Festexos, pero esta llocalidá de Samartín del Rei Aurelio nun va quedar quieta. L'asociación xuvenil Que Nun Apare! decidió dar un pasu alantre pa enllenar el vacíu cultural existente -sobremanera pa la mocedá- y por eso'l sábadu 15 de xunetu va entamar el primer festival de cultura urbano del conceyu, un eventu pa tolos públicos que se va celebrar nel C.P El Coto.

Dende les diez de la mañana hasta la una de la madrugada L’Entregu va ser un pueblu enllenu de cultura urbano, entiendo esta como aquelles actividaes que se faen na cai socialmente y con daqué arume alternativo. Amás esti festival tamién nagua por apostar pola multicultularidá, amestando nel programa parte de la esencia de Xamaica, del Bronx y d'África; too ello ensin escaecer los raigaños culturales asturianos. Ye por esto que va haber danza africana, un pasucais de los Gaiteros del Carbón, una auténtica sound system –los potentes equipos musicales artesanales y portátiles que nacieron en Xamaica nos años 50-, espectáculu de circu, y conciertos hiphop y reggae con Dani Antistylo, Sebas SBS, K-Nalón, Guaja D y Allanái Soundsystem.

El deporte va tener tamién un papel bien destacáu nesti festival con un tornéu mistu de baloncesto, zona de skateboard y xuegos y deportes tradicionales asturianos. Pa la organización la pata educativa ye fundamental, polo que va haber talleres de pintacares y globofexia, de graffitti y de risoterapia; amás d’una charra alrodiu la cultura sound system.

A la fin, el “I Festival de Cultura Urbano de Samartín” va ser una montonera d'actividaes pa tolos públicos que van ufiertar daqué distinto al conceyu, apostando amás polos artistes y creadores asturianos y de la Cuenca’l Nalón. Una cita autoxestionada pola mocedá y desendolcada tamién gracies al sofitu de los vecinos y de los comerciantes de L’Entregu.


Lletres, femenín plural. Actos institucionales de la 38 Selmana les Lletres

Redacción
Vienres 21, Abril de 2017, 4:43 pm

Xueves 27 d’abril. Día de les Lletres nel exterior

20h. Centru Asturianu de Madrid

  • Presentación-coloquiu del llibru “Escritores asturianes. Antoloxía de testos n’asturianu y gallego-asturianu”
  • Actuación d’Anabel Santiago 

 

Martes 2 de mayu

10-12h Uviéu. Xunta Xeneral

  • Visites escolares guiaes en llingua asturiana y gallego-asturiano.

10-14h Xixón. Cimavilla

  • Visites escolares guiaes pel barriu de Cimavilla

12h Uviéu. Xunta Xeneral

  • Llectura pública institucional de testos n’asturianu y gallego-asturianu

19.30-21h Xixón. Cimavilla

  • Visita guiada pel barriu Cimavilla. (Máximu 25 persones. P’acutar: 985106741 o splnormalizacion@asturias.org dende’l llunes 24 al vienres 28)

19.30h. Uviéu. Auditoriu (Sala de Cámara)

  • Muyeres y lletres. Actu homenaxe a les escritores asturianes.
  • Llectura dramatizada de restos escritos por muyeres (Con Carla Loga y Ernesto González como actores, acompañaos por Amparo Antuña al pianu)
  • Actuación d’Anabel Santiago

Miércoles 3 de mayu

10-14h Uviéu. Cascu históricu.

  • Visites escolares guiaes

18-21.30h. Corvera

  • Versovera. Atopada poética de Corvera (En colaboración cola Casa de la Llingua-SNLl de Corvera)
    • De 18 a 19.30h nel Centru Cultural de Cancienes
    • De 20 a 21.30h nel Centru Cultural de Les Vegues

19.30h-21h. Uviéu. Cascu históricu

  • Visita guiada pel Cascu históricu d’Uviéu. (Máximu 25 persones. P’acutar: 985106741 o splnormalizacion@asturias.org dende’l llunes 24 al vienres 28)

19.30h. Grau. Capiella de los Dolores. (En collaboración cola Fundación Aula de les Metáfores)

  • Llectura poética al cargu d’Ángeles Carbajal, premiu “Xuan Mª Acebal” de Poesía 2016.
  • Entrega de diplomes del “IV Premiu de Poesía Selmana de les Lletres”, p’alumnáu del conceyu de Grau.
  • Actuación musical d’alumnáu del Conservatoriu Superior de Música Eduardo Martínez Torner

Xueves 4 de mayu

12h. Avilés. Plaza Domingo Álvarez Acebal

  • Inauguración de la V Feria del Llibru y Discu n’asturianu.
  • Presentación del llibru “Escritores asturianes. Antoloxía de testos n’asturianu y gallego-asturianu”

La Feria va tar abierta de xueves a sábado de 11 a 14h y de 17 a 21h. El domingu de 11 a 19h

18h Xixón. Teatru de La Laboral

  • Gala d’entrega de los premios del IV Certame de teatro escolar en llingua asturiana y gallego-asturianu. Cola representación d’obres premiaes y la entrega de premios en toles categorías.

Vienres 5 de mayu. Día de les Lletres Asturianes

12h Mieres. CP Santiago Apostol

  • Actu escolar institucional de celebración de la 38 Selamana de les Lletres Asturianes.
  • Intervención d’autoridades
  • Estrega de premios del XXII Certame de creación artística /lliteraria, XIV Certame de Cartelismu y VI Certame de Creación Audiovisual.
  • Actuaciones

Sábadu 6 de mayu

19h A Caridá. Auditoriu da Casa das Quintas

  • Homenaxe ás nosas lletras.
  • Espectáculu musical País Malva, de Muyeres.

Llunes 8 de mayu

11h Xixón. Teatru de La Llaboral

  • Espectáculu “Histories detectivesques”, de Guayominí Producciones, p’alumnáu de Primaria

19h Corvera. Centru Sociocultural de Les Vegues

  • Representación teatral de “Yeren dos guah.es…(Los versos de Vitor Manuel como obres de teatro”, al cargu de los Talleres de teatro p’adultos de Corvera.

Martes 9 de mayu

11h. Xixón. Teatru de La Llaboral

  • Espectáculo “Disculpe, caballeru”, de ZigZag Danza, p’alumnáu de Secundaria.

19.30h Uviéu. Sala Borrón

  • Entaína a escribir. Segundu concursu de microrellatos improvisaos n’asturianu pa xente mozo

 

 


IV Día de la Reciella

Redacción
Xueves 29, Setiembre de 2016, 4:57 pm

Esti domingu 2 d’ochobre, celébrase la IV edición del Día de la Reciella. Esti añu con munches más actividades, colaboradores y una novedá bien prestosa: la primer edición de la carrera de families pol asturianu Entaína.

Esta carrera ye precisamente la que garra más protagonismu nel cartel (obra del diseñador Marco Recuerdo), simbolizando’l testigu’l propiu idioma y la tresmisión de xeneración en xeneración, aspectu nel que tamos especialmente enfotaos y enfotaes dende los entamos de l’asociación. Yá ta na web de Reciella (www.reciella.com) el formulariu d’inscripción, y tola información, tanto de la carrera como del restu d’actividaes que van desarrollase esi día.

Asina que yá sabéis, el domingu 2 d’ochobre tenéis una cita a la que nun podéis faltar, ¡pasái’l testigu!

Programa

10.00 Entrega dorsales de la I Entaína. Llugar señaláu al llau de la bolera (Muséu del Pueblu d’Asturies)

11.00 Salida Entaína.

11.30 Llegada de la carrera, entrega avituallamientu, llectura manifiestu y sortéu premios.

12.00 Partíu fútbol infantil exhibición U.C. Ceares comentáu por Nacio González.

12.30 Taller “Facemos llambiotaes” cola collaboración de Miel Et canelle

12.30 Taller  “Facemos xuguetes con material reciclao” cola collaboración d’EMULSA

13.00 Cuentacuentos a cargu de l’actriz Olga Cuervo

14.00 Posa y xinta con comida y bébora variao (tamién vegano) nel chigre de Reciella.

16.00 Cuentacuentos y taller Samalandrán. Islla de lleendes

17.00 Taller “Bombes pa les nueses amigues les abeyes”

17.30 Actuación de la banda infantil de Gaites de Villaviciosa “El Trubiecu”

18.30 Conciertu Bestiariu

Amás: Pintacares (12.00 y 17.00 hores), rifa de productos infantiles n’asturianu enantes del conciertu,  tiendes del aire con lliteratura y música infantil y xuvenil de la editorial Pintar-Pintar,  xuegos tradicionales cola collaboración del Garrapiellu y los personaxes de Moyando’l culu de Ruma Barbero en photocall. Toles actividaes son gratuites sacante’l pintacares (1€). Pa los talleres y el pintacares fai falta acutar plaza nel puestu de Reciella

 

Yá aporta la seronda

el branu acabó yá.

 Llevanta de la cama,

 vien un día especial.

Conciertos, tallerinos,

 folixa y pa rucar,

 deporte, teatru, baille,

 cómic y muncho más.

 (est) Collaciu entaína,

y díi-ylo yá a to ma

Nel Día la Reciella

pasámoslo xenial.

Collacia entaína

y díi-ylo yá a to pá,

 vamos a les carreres

esto nun pue parar.

 Collaciu entaína,

y díi-ylo yá a to ma,

porque'l saber más coses

 nun ocupa llugar.

Y más si ye xugando,

asina presta más. (bis)

Families mui diverses

y un únicu oxetivu:

Tresmitir l'asturianu,

ven y corri comigo.

Que ta Asturies entera

esperándonos yá.

 Xeneraciones nueves

d'esta nun va pasar.

 Que pasen el testigu

per tierra, aire y mar.

Pa que la nuestra llingua

 viva mil años más.

(est)

 Garramos el testigu por nós nun va quedar


Patricia Saco Torre. Ilustrando pa neñes y neños

Iván G. Fernández
Sábadu 4, Abril de 2015, 2:52 pm

La ilustradora y diseñadora Patricia Saco Torre nació en L’Entregu (Asturies) hai venticinco años y, como a tolos rapacinos, dende neña prestaba-y dibuxar. Prueba d’esto ye que’lo so regalu fetiche yera un paquete de folios de 500 fueyes, que según ella «agotábase a la velocidá de la lluz a güelpe de garabatu en Plastidecor».

Otra de les sos pasiones de neña son los animales y la naturaleza, dalgo que queda bien demostrao nos sos trabayos porque la mayoría d’ellos tán basaos en bichos peludos, antropomórficos, nel mediu natural y con composiciones orgániques. «Pasaba les tardes metida en casa lleendo enciclopedies de la vida animal y guíes celestes de botánica», esplica.

Per otru llau, los interés de futuru d’esta ilustradora moza siempre tuvieren xuníos a eses dos víes y, depués de la escuela y l’institutu –y la so «ineptitú pa les asignatures científiques» confiesa−, y el sofitu imprescindible del so profesor de plástica d’últimu añu, animárenla a siguir pel camín del artisteo.

Saco Torre matriculóse a los dieciséis años na Escuela d’Arte d’Uviéu onde cursó’l bachiller artísticu y dos años depués fixo la especialiación d’Ilustración. Foi nesa época onde per primer vegada tomó conciencia de que quería enfotase na ilustración infantil. De mano, los sos gustos nesti ámbitu yeren mui diferentes pero desque entró nel mundín artísticu empezó a beber de les influencies que-y aportaren los sos profesores y compañeros de clase.

El so estilu como ilustradora ta influenciáu por dellos artistes clásicos del sieglu XIX, como Arthur Rackham, Edmund Dulac, Heinrich Kley, tanto pola llinia de dibuxu como pola manera d’iluminalos: l’acuarela. Y anque les nueves tecnoloxíes vienen pisando fuerte Saco Torre diz que sigue apegada al ritu del papel encintáu, el tablón de madera y la caxa de les acuareles. Aparte de la influencia de los clásicos, nos sos trabayos tamién pué vese un toque del mundu de l’animación Disney –artistes como Glen Keane o Chris Sanders− y una presencia constante d’ilustradores contemporáneos como Helen Oxenbury, Christopher Denise, Rebecca Dautremer, Svetlin Vassilev, Alessandro Barbucci, Manuel Arenas...

Pa la xente mozo'l mercáu de la ilustración «ye de difícil accesu» y «supón una gran inversión de tiempu y esfuerciu si quies consiguir asomar la cabeza y que’l to trabayu llegue a ser material d’imprenta», comenta y, al empar, asegura que tres acabar los sos estudios pasó una llarga temporada mandando portfolios a axencies y editoriales, ensin muncho éxitu nel estáu español pol so estilu «anticuáu» −según les editoriales−. De toles maneres, pago la pena l’esfuerciu y decidió llanzáse a l’aventura del llibru electrónicu. Contactó cola autora americana Julia Dweck y l’alemana Kim Maëkl pa trabayar na plataforma Amazon y d’esa manera ampliar el so campu de trabayu nel Reinu Uníu –patria de los sos ilustradores de cabecera−. Agora mesmo Saco Torre ta a la espera de firmar cola axencia d’ilustradores londinense Plum Pudding. Dica a poco, tenemos la seguridá de qu’esta ilustradora de L’Entregu va dar muncho que falar nesti ámbitu, porque talentu nun-y falta. Los sos trabayos pueden vese  en patriciasacoillustration.tumblr.com

 


María Díaz Perera: Siempre toi nun procesu de búsqueda

Eduardo Carruébano María Díaz Perera
Vienres 2, Xineru de 2015, 4:30 pm

María Díaz Perera nació un branu de 1980 en Xixón y yá dende neña supo qu’hai poques coses na vida que-y presten tanto como dibuxar. Ésta apasionada de la música ye hoy una realidá que se fai notar a nivel estatal col so bon trabayu.

La ilustradora asturiana decidió va unos años aparcar la so faceta como diseñadora pa dedicase esclusivamente a dibuxar, lo que más-y presta y polo que, con munchu trabayu y talentu, va garrando un nome nel panorama estatal

 

¿Cuándo empezaste a dibuxar?

Nun lu sé esactamente porque siempre me recuerdo con llapiceros na mano. Supongo qu’empecé como tolos neños y neñes pero pa mí yera tan divertío como xugar, yera lo que realmente m’entretenía y asina, ensin querer, seguí xugando hasta hoi.

 

¿Cómo definiríes el to procesu creativu?

Siempre depende del momentu y del tipu de trabayu. La mayor parte de les mios illustraciones son dixitales, pero normalmente parto del dibuxu a llápiceru, trabayando un poco’l conceptu hasta que lu tengo más o menos claro y depués lu acabo nel ordenador. Lo que sí necesito pa concentrame ye trabayar sola, con dalgo de música y poco más.

 

¿Cuáles son los tos referentes? ¿Qué ilustradores, corrientes o películes tuvieron influencia nos tos trabayos?

Ye mui difícil concretar porque son munchos y mui diferentes. Foron importantes pa mi illustradores como Ana Juan o Eric Drooker, artistes como Peter Blake, Otto Dix, Francis Bacon… ¡Hai tantos! Pero tamién atopo referencies nel cine, la lliteratura y sobre manera na música.

 

¿Llevóte munchu tiempu atopar el to propiu estilu?

Tovía nun sé si lo atopé porque creo que siempre toi en procesu de búsqueda. Intenté trabayar con diferentes estilos pa esperimentar y intentar descubrir un llinguaxe col que tuviera cómoda. Creo que poco a poco voi definiéndome y voi viendo dalgo más d’unidá nel mio trabayu como illustradora, pero too depende de lo que necesite espresar. Parezme interesante evolucionar y nun quedase estancáu siempre nun estilu mui concretu.

 

Tras llicenciate n’Historia del Arte pola Universidá d’Uviéu decidiste estudiar Diseñu Gráficu ¿Xurdió como la necesidá d’apostar por un futuru llaboral nel que la illustración formase parte del to día a día?

Estudié Historia del Arte porque realmente me prestaba, pero al marxen yo siguía dibuxando y faciendo les mios coses hasta que’l cuartu añu de carrera, depués de valoralo bien, decidí que tamién quería facer Diseñu, porque m’interesaba muncho y pensé que diba tener más salides profesionales o, polo menos, s’acercaba más a lo que realmente quería dedicame.

 

¿Ye’l to trabayu tal y cómo esperabes una vez empezaste los tos estudios na Escuela Superior d’Arte d’Asturies (ESAPA)?

Cuando estudiaba na ESAPA pensaba qu'al terminar diba poder dedicame al diseñu, dalgo que conseguí durante unos años, pero agora mesmu toi cuasi totalmente centrada na illustración, y el planteamientu del mio trabayu agora mesmu ye mui diferente de cuando empecé.

 

Fuiste una de les mitaes de Pixelbox −l’estudiu gráficu que fundó xunto con Pablo Tejón−, un periodo durante'l que dalgunes de les tos illustraciones foron galardonaes en certámenes de premios como los Motiva o los Anuaria. ¿Cómo recuerdes aquella etapa? ¿Qué diferencies atopes ente dedicate por completu a la illustración y el to anterior trabayu como diseñadora?

La mio etapa'n Pixelbox foi mui importante en muchos sentíos. Foi la mio primera esperiencia llaboral, a lo qu’hai qu’añadir l’esfuerzu qu’implica crear y sacar alantre la to propia empresa. Valoro muncho esos años porque deprendí munches coses, tanto del mio sociu como de la esperiencia del día a día, de los clientes, de la organización del trabayu y del tiempu. Agora como freelance mantengo munches de las pautes que deprendí ellí, pero tengo que m'organizar de forma diferente al trabayar sola.

 

Tienes cientos de siguidores nes redes sociales. ¿Convirtiéronse nuna ferramienta imprescindible pa la difusión del to trabayu?

Nun creo que sían del too una ferramienta imprescindible pero sí abondo importante. Creo que son mui útiles si se-yos da bon usu. Ayuden muncho a la hora de difundir de forma mui rápida el to trabayu y creo qu’agora mesmo sería impensable nun aprovechales.

 

A lo llargo de la to trayectoria son munchos los proyectos que llevasti alantre. ¿Dalgún trabayu del que te sientas particularmente arguyosa?

Dende que toi pola mio cuenta hai dellos proyectos a los que-yos tengo munchu cariñu, pero quiciabes el más importante hasta hoy ye una campaña publicitaria pa Mahou que ta acabante salir el branu pasáu.

 

¿Qué proyectos tienes a la vista?

Toi trabayando en dellos encargos al mesmu tiempu, pero'l que más ilusión me fai ye un proyectu d’álbum illustráu nel que llevo trabayando dende fai dalgún tiempu.

 

¿P’acabar, dalgún conseyu p’aquellos que quieren dedicase profesionalmente a la illustración?

Dibuxar, dibuxar y dibuxar. Centrase no que realmente a ún-y presta, trabayar duro pa buscar un llinguaxe propiu col que poder expresase.



1 | 2 | Siguiente » | Última »»

Últimas
Al azar

Hemeroteca

Buscador