Raúl García


Felpeyu abre’l Festival Arcu Atlánticu soplando 25 veles

Raúl García
Miércoles 26, Xunetu de 2017, 6:33 pm

Había muncha gana yá de discu nuevu de los felpeyos y “Cerquina” ye un discu fechu sele pero con gustu, como casi toles coses bones de la vida. L’anterior discu “Canteros” ye del añu 2008 y estos 9 años hubo dellos cambios na formación, Senén Fernández sustituyó a Dudu Puente nel baxu y la voz y Fernando dexo’l grupu pa que garrase’l bouzuki Elías García.

Cerquina ye un discu que sigue col soníu felpeyu 100% pero qu’al mesmu tiempu incorpora nueves sonoridaes, sobremanera gracies a la voz de Senén Fernández. Delles igües bastante averaes al pop, canciones instrumentales tradicionales tamizaes pela peñera del grupu qu’ayer cumplía 25 años na Plaza Mayor de Xixón nun conciertu especial. Pa la ocasión rodiáronse de vieyos componentes y collacios del grupu como los hermanos ourensanos Cástor y Felix, Xel Pereda, Isidro Suárez, Xuan Nel Expósito, Ramón González Morán, Rubén Bada, Ángel Ruiz o la Banda de Gaites LaKadarma.

Temes clásicos del grupu como los “Fayeos de mayo” na voz de Xel Pereda con gran parte del públicu cantándola, ”Llevántate neña” o munchos del nuevu discu como “Escaecimientu”, “Ferreirín” o “Xota d’Igor”, n’homenaxe a Ígor Medio, miembru de Felpeyu bien d’años xunto con Carlos Redondo y fallecíos tráxicamente nun viaxe del grupu.

Les cuerdes de Moisés Suárez y Elías García faen una base rítmica tremendamente efectiva y que lleva la melodía perbien arropada, instrumentales como “Andaricas ya cacharros” con tres temes del vigulineru Lisardo Prieto o “Alboraes de Perlora” rescatando pal discu una alborada del repertoriu de gaita tradicional, son bona amuesa de que la música de Felpeyu va siguir faciéndonos disfrutar, esperamos que munchos años más.

La parte cantada axunta temes como “A la mar” una modernización con unos coros bien guapos de la tradicional “A la mar vanse los ríos” o “Ferreirín” cantada na variedá sur-occidental del asturianu que fala del despoblamientu de les zones rurales y esi sentimientu de señardá de los emigrantes, una idea tan clásica y al mesmu tiempu tan actual…

La parte gráfica del cd ta diseñada por Ruma Barbero (bodhran) con semeyes de la Ciudá Residencial de Perlora. La decadencia d’esta, cuento que ye la cara contraria de la situación del folk asturianu que pasín a pasu paez que revive. Les lletres del discu tan na so mayoría escrites tamién por Ruma Barbero, sacante un tema de Boni Pérez, un habitual nos discos de la banda xixonesa.

A pesar de tolos contratiempos na so llarga hestoria estos 25 años, Felpeyu amosó ayer na Plaza Mayor de Xixón dientro del Festival Arcu Atlánticu porque ye ún de los grupos punteros del folk asturianu y porque tien de siguir esistiendo. Capaz de llenar la plaza y abrir nuna nueche histórica'l Festival Arcu Atlánticu de Xixón qu’estos díes sigue con tola so programación. Llarga vida a Felpeyu!


I Congresu Internacional 'Gaites nel mundu'

Raúl García
Miércoles 19, Xunetu de 2017, 4:50 pm

Nava vien siendo dende va años el sitiu onde a la gaita se-y da la importancia que, más pa mal que pa bien nun se-y da n’otros conceyos d’Asturies. La Escuela de Música de Nava entama dende’l 18 de xunetu el  “I Congresu Internacional Gaites nel Mundu: 1917 – 2017 – 2117” , y que se ta desendolcando estos díes en diferentes escenarios de la capital naveta.


La tarde del martes 18 entamaba con una conferencia del profesor de musicoloxía na Universidá d’Uviéu, Ángel Medina, autor del estudiu sobre la misa de gaita y que detalló dellos puntos d’interés sobre’l tema. Darréu, una mesa redonda onde Chus Pedro, Hugo O’Donell, Jose Angel Hevia, Ramón Prada, Xuan Bello y Xune Elipe aldericaron y charraron acerca de lo que ye la gaita y a ónde tien de dir. L’alderique tuvo sirvíu y fízose una bona conversación sobre dellos puntos de vista al fin y al cabu paecíos sobre’l tema.

La gaita asturiana nun sólo ye un instrumentu musical más, la gaita n’Asturies ye una seña d’identidá y como tal tien munchu más significáu.

La necesidá d’apueste políticu pa meyorar les condiciones, la llingua como exe vertebraor y el sofitu al mundu cultural asturianu  del que la gaita forma parte cimera dende instituciones publiques y privaes, podríen ser les conclusiones de la tarde.

Y van siguir les actividades estos díis en Nava con una montonera xente aldericando al rodiu de cuestiones diverses como la perspectiva de xéneru, el feminismu o la creatividá pero siempre rellacionándolo cola gaita, o con cuestiones como la gaita y la emigración asturiana, tan importante en tola hestoria d’Asturies. Ye imposible concretar el mundu de la gaita asturiana sólo nes lleendes polítiques de lo qu’anguaño ye’l “Principáu d’Asturies” y ello llévanos a bien de matices perinteresantes na forma de ver la música.

La entrega del premiu de percusión “Manegueru de Nava” a María Isabel López Parrondo pola so llabor nel sur-occidente principalmente y a Ricardo Moreno, “El colchoneru”, por toa una vida dedicada al tambor asturianu, tien llugar tamién dientro de los actos del congresu. Muestres artístiques de los artistes del conceyu y conciertos d’Odón García y Fonsu Les Regueres, Cantaruxare o L-R, completen la programación d’esti I Congresu qu’esperamos que nun quede nel escaezu como yá paso coles Xornaes de Música Tradicional de Nava.


Lorient 2017. Vamos p'allá!

Raúl García
Vienres 14, Xunetu de 2017, 1:07 pm

Festival Interceltique Lorient 2017

Mochila? Gafes de sol? Ganes de conciertos? Vamos p’alla!

Queda bien poco yá pa qu’entame la 47º edición del Festival Interceltique de Lorient,  que resiste’l pasu de la crisis nel mundu de los macroeventos musicales con una combinación bastante bien acertada de clásicos y novedaes. El Festival de Lorient foi galardonáu l’añu pasáu como meyor festival urbanu de Francia y ye una de les grandes cites del branu nel estáu francés, qu’atrái hasta Lorient a xente llegao dende tolos requexos de Bretaña, Francia y toa  Europa.

Esti añu'l FIL ta dedicáu a Escocia, un país con una escena musical bien puxante, sobremanera na so capital o na ciudá de Glasgow. Quicias Glasgow ye una de les ciudaes europees con más llocales de conciertos qu’ufierten una programación añal mui grande en cuantu a feches y estilos. Falar d’Escocia ye traer a la mente grupos punteros como Simple Minds, Franz Ferdinand o más averándonos al folk Capercaillie o The Tanahill Weavers. Ensin duda, Escocia sabe potenciar perbien la so industria musical con una rede de centros d’enseñanza profesionales, festivales y grupos profesionales y amateurs que texen un gran atractivu turísticu y económicu pal país. Yá quixéramos n’Asturies…

El FIL sigue teniendo cites clásiques dientro de la programación como son la Grande Parade des Nations Celtes, un desfileque’l primer domingu enllena la ciudá de grupos de baille y bandes o les Nuit Magique que tienen llugar nel Stade du Mostoir, esti añu cola representación asturiana de la Banda de Gaites Candás y el Grupu de Baille Xeitu d’Uviéu. Tamién atraen bien de xente les fest-noz que tienen llugar toles nueches na Salle Carnot, onde se suceden una tres d’otra actuaciones de pareyes de biniou – bombarda, dúos de cantantes, tríos… y que son l’esponente máximu del baille en Bretaña. Referentes de les nueches en danza asturianes, naguamos porque dientro d’unos años el panorama n’Asturies podamos observalu de la mesma mena qu’ellí, onde’l baille tradicional ta vivu y de plena actualidá. Nun ye difícil ver nel mesmu corru mozos y moces ventiañeros compartir baille con xente bien mayor y qu’esto tenga llugar de manera totalmente natural.

En cuantes a la ufierta de grupos, la programación del FIL tien cabeces de cartel pop-folk escocés como Amy MacDonald (conocía equí va unos años pola so canción “This is the life”), RunRig, el gaiteru asturianu Hevia que presenta pa la ocasión un conciertu de fusión astur-caribeña y que va compartir nueche con The Celtic Social Club nel Espace Marine o los escoceses Capercaillie.

Como otres propuestes interesantes podemos citar varies, los bretones Fleuves, grupu revelación del añu pasáu en Bretaña y que vien de ganar el premiu “Coup de coeur du jury” de los Prix Musical Produit en Bretagne 2017 pol so álbum epónimu “Fleuves”. Son un tríu compuestu por Emilien Robic al clarinete, Romain Dubois a les programaciones y el rhodes y Samson Dayou al baxu llétricu. Un grupu con una propuesta musical atípica y novedosa nel panorama, que revolucionó les fest-noz con un propuesta bastante llétrica, valiéndose pa ello de la especial sonoridá del pianu Rhodes sofitáu pol baxu llétricu y el clarinete llevando la voz cantante nel grupu. Nun pierden pa nada la conexón col mundu tradicional y ponen el pie a tierra de llenu nel repertoriu de baille. Si hai una pallabra que los define, ensin nenguna duda ye “groove”.

Una de les ocasiones más prestoses pa velos quicias seya l’espectáculu de producción propia del FIL “Honneur au Fest Noz”, onde van compartir escenariu con Amieva, grupu bretón con presencia asturiana, Barba Loutig, cuartetu vocal femenín bretón y l’amiestu entre la Orquesta Sinfónica de Bretaña y el dúu formáu por Erwan Hamon (bombarda) y Janick Martin (curdión). Ver una orquesta sinfónica conduciendo por exemplu una gavotte nun ye lo más común, y la combinación fai un conciertu dignu de marcar n’axenda del festival.

El Bagad Cap Caval, ún de los que siempre tan nel xuegu por alzase col troféu de campeón del Championnat des Bagadoù, presenta tamién nel FIL el so caberu espectáculu “Tan de’i”. Acompañaos de les voces de Barba Loutig y Phil’Armorik Orchestra amuesen el bon facer del bagad bigouden, melodíes tradicionales sumaes tamién a composiciones propies de dellos miembros del bagad como Tangi Sicard o Sylvain Hamon pa esti proyectu que vien a continuar el camín de los espectáculos anteriores (Hepken, Ijin y Ololé) y que sigue pela mesma sonoridá propia de la banda. Una banda con identidá propia y definía col so soníu que lleva la so propuesta elegante y de trabayu al Teatru de Lorient.

La carpa de Bretaña, asitiada al final del puertu acueye bien d’eventos interesantes como’l Trophée Loïc Raison, el concursu Kitchen Music o conciertos toles nueches. Grupos interesantes pa ver nesta carpa hai munchos y d’estilos variaos tola selmana, grupos mozos como Talskan o C’harr Nij pero tamién grupos más maduros como podría ser el casu de Yann-Fanch Kemener, Ndiaz, Karma, Skeduz, Söig Siberil o Oliolio.

Oliolio ye una referencia siguir dende que nel 2014 se xuntasen Julien Le Mentec al baxu, Erwan Volant a la guitarra, Gweltaz Rialland al saxo y Stevan Vincendeau cola curdión. La llista de grupos onde tocaron caún d’ellos sería enforma llarga anque sería una muestra de grupos bien interesantes por demás. Seguramente poles múltiples obligaciones de toos en otros grupos, Oliolio nun ye de los grupos con más feches nel calendariu, pero musicalmente son una referencia. Sorprenderán pa bien grabando discu un añu d’estos? Mentanto queda velos en direutu.

Al tar dedicada esta 47º edición a Escocia, la muestra de grupos d’aquelles tierres ye más importante qu’otros años. L’Espace Marine dedica varies nueches a la música escocesa y na Soirée d’Ouverture Écosse va poder disfrutase de la música de la moza Mischa Macpherson en formatu de trío (gran promesa del cantu gaélicu ganadora de dellos reconocimientos nos MG Alba Scots Trad Music o nos BBC Radio 2 Young Folk Award) o The Elephant Sessions de los que yá ficimos revisión na crónica del Celtic Connections cola so fusión de folk llétricu. Na nueche del llunes 7 d’agostu, Blazzin Fiddles, Capercaillie o Breabach acompañaos tamién d’unos más mozos Fara o Talisk subirán al escenariu y ensin duda faerán una nueche memorable. Vien pegando fuerte la representación escocesa

Tamién rescampla l’homenaxe a Gordon Duncan, ún de los gaiteros escoceses más mediáticos de les últimes décades. Esti gaiteru marco época non sólo n’Escocia y coincidiendo col 12º aniversariu de la so muerte dellos alumnos, collacios y gaiteros en xeneral como Hervé Le Floc’h, Fred Morrison, Ross Ainslie, Ali Hutton, el so hermanu Ian Duncan o’l gaiteru asturianu José Manuel Tejedor xúntense p’alcordase del gran maestru.

Anabel Santiago, Dixebra, Vicente Prado Suárez “El Pravianu” y los cuatro concursantes del Trophée MacCrimmon, Jesús Álvarez, Jaime Álvarez, Fernando Cárcaba y Xermán Álvarez zarren la representación asturiana amás del yá citáu Jose Ángel Hevia, la Banda Gaites Candás, y Xeitu.

Al marxe d’estos grupos citaos como recomendación, convidámosvos a echar un vistazu al programa completu del festival y dexavos llevar. Pa los que nun puean asistir, voi intentar averar un poco de lo que pase eses feches na ciudá hasta vërtigu.  Mochila? Gafes de sol? Ganes de música? Vamos p’alla!


Vivencies nel FIL 2016

Raúl García
Xueves 29, Setiembre de 2016, 3:54 pm

Falar de nueves propuestes vistes y sentíes nel FIL ye pelín abegoso, pero nun dexa de ser al mio entender una de les coses más interesantes que puedo facer como “enviáu especial” de Vërtigu.

En materia de gustos ye difícil coincidir toos por ser algo suxetivo y propio de caún, pero cuento con qu'a daquién más que yo-y hayan prestao esos grupos si ye que poco a poco van faciéndose camín nel perdifícil mundu de la música anguaño. Nun ye solo'l grupu, si non que tien bastante que ver nes nueses percepciones el momentu, y el FIL ye un bon sitiu p'abrir les mires, esplorar nueves sonoridaes y dexase llevar poles novedaes.

Acaben sumándose na memoria canciones y grupos de xeitu un pocu caóticu, pero gracies a la promo qu'anguaño faen los grupos n'internet, nun ye difícil sigui-yos la pista p'acceder a la so música.

Muyeres, Cherrygroove, duo du bas, gourlañ quintet, istan quartet, oriaz, tymen kerveillant....

El colectivu Muyeres llegaba a Lorient pa presentar el so trabayu “País Malva”, un espectáculu perbien escenificáu, mui cuidada la puesta n'escena con un vestuariu que ruempe dafechu col matrimoniu música tradicional = traxe tradicional. Ye algo bien necesario n'Asturies y que como bien se vió ye un espectáculu vendible amás d'estrapolable a cualquier teatru del mundu.

Cherrygroove foi un conciertu de los que'l grupu teloneru te sorpriende pa bien, compartíen cartel nel Espace Marine con Duncan Chisholm y llamaron l'atención con un unes voces femenines mui cuidaes y un soníu que recordaba muncho a veces a la mítica banda escocesa Capercaillie, música tranquila que casaba bien pa col show de dempués de Duncan Chisholm.

Semeya Dúu du Bas, Serj Philouz

Duo du Bas compartíen cartel col grupu asturianu Muyeres y son una representación perfecta de la polifonía del cantu bretón. Hélène Jacquelot y Elsa Le Corre formen esti dúu con una puesta n'escena cuidada y bien guapa. Elsa ye quiciabes más conocía, y forma parte tamién de Pevarlamm y foi cantante na Kreiz Breizh Akademi #4, un proyectu perinteresante del cantante Erik Marchand entre otros que da a conocer y forma al mesmu tiempu a músicos mozos. (*Semeya Dúu du Bas, Serj Philouz)

Dientro de la programación de la Quai de la Bretagne, ún de los escenarios más punteros no qu'a música bretona se refier, pudo esfrutáse l'actuación de Gourlañ Quintet, grupu con delles reminiscencies a otros grupos como Startijenn pero qu'incluye en dellos temes la zanfona, instrumentu mui pocu usáu nos grupos de fest-noz y que-y apurre sonoridaes paecíes a grupos más del sur del estáu francés como Djal, pero con un repertoriu 100 % bretón. Propuesta interesante

Ïstan Quartet ta formao por cuatro “besties pardes” bien conocíos por tola so trayectoria como son Jacky Molard, Sylvain Barou, Ronan Pellen y Julien Stevenin. Xunta'l virtuosismu de los cuatro caún col so instrumentu y tienes dos opciones: sentate, que la cosa ye pa escuchalo con calma o facer a lo bretón y bailalo como si nun hubiera un mañana. Tu mesmu.

Dende'l Pays Nantais llegaba Oriaz. Oriaz llega de la mano de François Badeau un curdioneru conocíu pol so trabayu na banda Esquisse, que tien un conceptu de la música bien interesante, dende lo más baillable y tradicional, a lo más instrumental y moderno. Nesti casu François camuda al baxu llétricu pa facer un grupu de fest-noz que col dúu guitarra/baxu reforza rítmicamente la melodía llevada por curdión y oboe/bombarda. Guapo, guapo.

Tymen Kerveillant Quintet,  con un discu nuevu de presentación debaxo del brazu subieron al escenariu a xugar cola so música. Ye tou un exemplu pa los asturianos en cuantu a la idea de que nun dexa de ser un discu de pareya de biniou/bombarda pasáu pol tamiz del añu 2016 incorporando matices funky, jazz, rock, la conxunción perfecta de combinar tradición y modernidá adaptando l'a veces duru d'escuchar repertoriu tradicional a los nuevos aires.

 

Una edición con conciertos e idees qu'esperemos que sigan el camín y nos den allegríes munchos años.

 

Kenavo Lorient!


¿Cómo sobrevivir al FIL sin morrer nel intentu?

Raúl García
Miércoles 20, Xunetu de 2016, 10:11 am

10 díes de festival, escenarios oficiales, un montón de carpes, conciertos y eventos a toes hores al mesmu tiempu en diferentes sitios de la ciudá...

Como sobrevivir al FIL sin morrer nel intentu?

FIL2016 

El Festival Interceltique de Lorient qu'esti añu cellebra la so 46º edición entá col estáu d'esceición declaráu en Francia, destaca sobremanera pola bayura de conciertos y eventos de distintu xeitu que pues topar, anque ye un festival focalizáu en grupos que podemos denominar folk o inclusu celta esto almite munches variantes d'estilos y d'unos años p'acá la organización tamién intenta averar a otru tipu de públicu con Simple Minds l'añu pasáu o cabeces de cartel pa esti añu como Joan Baez o The Corrs.

Nun perdese absolutamente nada ye misión imposible y vamos tener de facer una esbilla en cuantes a los nuesos gustos. Dientro de los diferentes escenarios del Festival, l'estadiu de fútbol de Mostoir acueye los espectáculos de les “Nuit Interceltique” onde ye posible ver nun recital una amuesa del folclor de tolos países representaos nel festival. Lluz, música, imaxe, y hasta pirotecnia faen d'esti espectáculu un “must” d'esos de ver una vez na vida. Tamién ye interesante pal públicu gaita-adictu'l Championnat des Bagadoù que nel marcu del festival cellebra la so fase final, na competición de primer grau podemos ver el nivel de creación y musicalidá de los bagadoù más potentes de Bretaña.

El Gran Teatru acueye bien de conciertos demientres los diez díes del FIL, y ye posible ver actuar n'él esti añu a la bayura de grupos australianos qu'actuen por ser la ediciòn dedicada a Australia. Va ser tamién l'escenariu que va recibir el domingu al Colectivu Muyeres presentando'l so espectáculu “País Malva” acompañaes na mesma nueche del perguapu grupu bretón Duo du Bas. Otros conciertos interesantes del mesmu escenariu son la presentación del nuevu discu del gaiteru Patrick Molard o “Melezour” el nuevu espectáculu de Bagad Kemper pa cellebrar los 70 años de Bodadeg Ar Sonerion, l'asamblea qu'arrexunta a tolos músicos de la práctica totalidá de los bagadoù.

El Palais de Congrés, asitiáu xusto ente’l  puertu de Lorient ye un poco'l centru neurálxicu de la organización del festival, onde hai taquilles pa poder mercar entraes a los distintos eventos, ye'l cuartel xeneral de la prensa de tolos países, y aparte d'ello sirve tamién como escenariu pa dellos conciertos como'l que van dar los asturianos Corquiéu o'l curdioneru Marcos García Alonso con “Errai”, una obra de composición formada por cuatro movimientos e interpretada por una selleición de musicazos de la escena asturiana. Acueye tamién como ye vezu tolos años el troféu MacCrimmon que cada añu axunta a gaiteros asturianos y gallegos compitiendo pol títulu enantes llamáu Macallan.

Al fondu d'esti mesmu puertu onde tan toles carpes de les diferentes delegaciones, incluyendo l'asturiana que por arte de maxa siempre acaba convirtiéndose nel pegollu de la folixa nocherniega, ta la Quai de la Bretagne, escenariu potentísimu del festival y onde podemos ver a los grupos más punteros de bretaña día tras día, la ufierta cultural nesti escenariu ye pa caer p'atrás, incluyendo un espectáculu esclusivu del FIL “New Leurenn #1” xuntando al baxista Julien le Mentec, veteranu na escena bretona con una montonera grupos como Tan ba'n ty, Regis Huiban Quartet, Landat-Moisson Quintet, Oliolio, con Korentin Le Davay, cantante del nuevu grupu Waz-Sav, un quintetu formáu por cinco mozos con munches ganes de facelo bien, veteranía y mocedá xuntes nel mesmu escenariu.

Al fondu del puertu a mano izquierda asitiase l'Espace Marine, carpa inmensa qu'acueye peles tardes espectáculos de grupos de toles delegaciones onde va actuar entre otros la banda de gaites invitada “La Laguna del Torollu” y el Grupu de Baille “Trebeyu” y peles nueches conciertos bien variaos, dende grupos bretones como Youn Kamm & Le Bagad du bout du Monde hasta The Corrs.

Como recomendación personal, fuera de la programación del festival pero complementándola tenemos el festival paralelu que tolos años entama'l chigre Tavarn Ar Roue Morvan, “Fest Ba'n Davarn”. El chigre folki por escelencia de Lorient, asitiáu más o menos ente la Quai de la Bretagne y l'Espace Marine, acueye tola selmana dellos conciertos perinteresantes incluyendo grupos que nun tan en otros escenarios, aparte de tener una ufierta perbona en materia de restauración.

Como veis, el Festival Interceltique de Lorient son diez díes mui intensos de música, folixa e intercambiu cultural con xente llegada de toles partes del mundu, una esperiencia inolvidable a la que vos convido a asistir, pero si nun podéis... tai al tantu de Vërtigu!


Últimas
Al azar

Hemeroteca

Buscador