Redacción


TSUNAMI XIXÓN anuncia dellos cambios qu'ameyoren el festival

Redacción
Xueves 13, Xunetu de 2017, 1:41 pm

La primer edición del Tsunami Xixón va camín de ser un ésitu total. El ritmu de venta a menos de dos selmanes para l'entamu anuncia un previsible “sold-out”.

La organización, por cuenta de los comentarios y suxerencies que fueron recibiendo desque anuciaron el cartelu y la distribución per díes  de los grupos, foi realizando pequénos axustes na programación col únicu fin de garantizar el bienestar de tolos asistentes y que tol mundu que tenga entrada pueda ver los conciertos de manera cómoda.

Distribucion

El principal cambéu foi atender un pidimientu constante que suxuría'l treslláu de parte de los conciertos primeramente programaos el vienres na Plaza Mayor a Llaboral Ciudá de la Cultura. Esto significa que va ser necesariu l'abonu para poder entrar, y va tar acutáu a los compradores de los mesmos.

Equí nun acaben los cambeos, dalgunos de los grupos primeramente anunciaos para sábadu van pasar para vienres para formar parte d'una sesión vermú en dicha Plaza Mayor, de calter gratuitu, que va tener llugar al mediudía. Darréu van tener llugar los conciertos gratuitos del skatepark de Cimavilla y depués los conciertos na Llaboral, onde'l sábadu va haber dos escenarios nos que se van alternar los grupos. Gracies a esto nun van esistir asolapes ente artistes en tol festival, asina que podrá esfrutase de tolos grupos del cartelu.

Una programación de dos díes, variada y pa tola familia, y qu'amás va dexar mientres el primer día poder esfrutar de conciertos somorguiaos na ciudá, na so gastronomía y na so xente, y afayar la esperiencia “tsunami”.

Pa poder movese ente escenarios, va haber llínea de buses constante ente zones de conciertos y tamién dende'l Camping de Deva hasta la ciudá.

Los horarios van tar llistos definitivamente nos próximos díes. TAI SOLLERTES

El Tsunami Xixón vien pa quedase y establecese en Xixón como xuna de les grandes cites del branu na Península.

VIENRES 28

LABORAL CIUDAD DE LA CULTURA: 

Toundra (con orquesta)
Desakato
Sexy Zebras
Acid Mess
Last Titans (finalista concursu Coma)

SESIÓN VERMÚ PLAZA MAYOR: 

Joey Cape
True Mountains 
Dani Llamas

SKATEPARK 

Misiva (Misiva Punk Rock)
The Garage Van


SÁBADU 29 (Laboral Ciudad de la Cultura)
The Offspring
Pennywise
Graveyard
The Sounds
Berri Txarrak
Talco

KADAVAR
Los Tiki Phantoms
Jardín de la Croix
Sam Alone & The Gravediggers
FAVX
VULK
Las Eléctricas (finalista concursu Coma)
Carisma (finalista concursu Coma)

 


Programación estra nel Gijón Sound Festival

Redacción
Vienres 24, Marzu de 2017, 11:31 am

Presentación del Llibru: “Loco. Cómo no llevar un estudio de grabación”  (Hurtado y Ortega editores)

La presentación del llibru va tener llugar el sábadu 1 d'abril a les 18:30 hores nel Salón d'Actos Antiguu Institutu.

Cuatro de les figures más sobresalientes de la escena musical xixonesa van dar voz a esta charra-coloquiu. Alcuentru que va sirvir como presentación del llibru cola presencia de:.

  • Boni Perez.
  • Pedro Vigil.
  • Nacho Vegas.
  • Paco Loco.  

 

30 Díes en bici na Favorita

GijónSound Festival repite collaboración con 30 Díes en bici, iniciativa que promueve l'usu diario y cotidianu de la bicicleta cola propuesta de pedaliar a cualesquier parte tolos 30 díes d'abril. Tou vale, una vuelta a la mazana, 20 km hasta'l trabayu o un paséu al atapecer, ¡lo que sía que siente bien! .Y pa dar pistolazu de salida a los 30 Díes en bici que nos esperen:

31 de marzu, 21:00 hores, Kick off Party nel Patiu de la Favorita cola bona música de DJ Diba

31 de marzu, 23:59 hores, Kick off Ride

Al filu de la medianueche, un añu más vamos cumplir cola lliturxa: recibir “el nuesu mes xubíos a la bici: vamos salir a la cai, vamos coyer les bicis y a les 00:00 hores del día 1 d'abril vamos tar dando'l primer paséu en bici. El Kick off Ride, como siempres una oportunidá pa esfrutar de les cais vacíes de coches y del silenciu, esa preciada ayalga na urbe cochista. Un suañu fechu realidá.

 

 


Alejandro Díaz Castaño ye'l nuevu direutor de Festival Internacional de Cine de Xixón

Redacción
Xueves 16, Marzu de 2017, 4:02 pm

Alejandro Díaz Castaño ye'l nuevu direutor de Festival Internacional de Cine de Xixón.

Dempués de meses d'espera, dempués de concursos y reconcursos, el FICX tien por fin nueva dirección. El xixones Alejandro Díaz Castaño, que ta acabantes de presentar el so nuevu trabayu IHESA /LA FUGA na Selmana del Audiovisual Contemporaneu d'Uviéu (SACO), va faese cargu del timón del Festival de Cine de Xixón nes próximes ediciones.

Alejandro Díaz Castaño yá trabayara nel FICX na dómina de Cienfuegos y na actualidá exercía de Programador del Festival Européu de Sevilla.


Fin de selmana a SACO

Redacción
Sábadu 11, Marzu de 2017, 11:20 am

Esti vienres entamó la Selmana del Audiovisual Contemporaneu d'Uviéu SACO3 que va tar presente na capital asturiana hasta'l prosimu domingu 19 de marzu.

Esta ye l'amplia propuesta pa esta fin de selmana:

Sábadu:

12h Teatru Filarmónica. LaSema (4-8 años)

13h El Manglar. Vermú con Pablo Und Destruktion dj

17h Teatru Filarmónica. Madame Courage

Direutor: Merzak Allouache

Arxelia, Francia | 2015 | 89’ |  color | árabe, sotituláu n’español

Omar vive nun barriu de chaboles cola so madre y la so hermana, ye un mozu solitariu y inestable que se busca la vida robando lo que pué. Ye adictu a un famosu sicotrópicu conocíu como “Madame Courage” (Doña Valor), les pastiélles Artane, bien popular ente la mocedá arxelino gracies a los sos efectos eufóricos y d'invencibilidad. Pero daqué camuda dientro d'Omar cuando decide roba-y a la moza.

17h Muséu de Belles Artes con Albert Serra

19h Teatru Filarmónica. La muerte de Luis XIV

Direutor: Albert Serra

Francia, España, Portugal | 2016 | 115’ | color | francés, sotítulos n’español

Luis XIV, el conocíu Rei Sol, vese obligáu a permanecer na cama por cuenta d'un fuerte dolor nuna pierna. Esto ye l'empiezu del fin del monarca, quien asistíu por médicu y cortesanos vive los sos últimos momentos. Nel so cuartu del palaciu de Versalles somos testigos del ocasu de la personalidá más poderosa de la Francia del sieglu XVII

22.30h Teatru Filarmónica. Recordando a Cohen. Omega

Direutores: José Sánchez-Montes y Gervasio Iglesias

España | 2016 | 80’ | color, B/N | español

En 1996 asoleya'l discu Omega, una collaboración ente'l cantaor Enrique Morente y el grupu granadín Lagartija Nick. Esti discu que fundía'l flamencu col rock cuntaba con adaptaciones de poemes de Lorca y con temes del apocayá fináu cantautor canadiense Leonard Cohen. Al traviés de distintos testimonios, ente los que s'atopen figures del flamencu como Tomatito,  Vicente Amigo y Alberto Manzano, amás de músicos d'otres escenes como Pat Metheny o Lee Ranaldo, de Sonic Youth, la película amuésanos la xestación d'esti revolucionariu discu. Una grabación considerada de cultu anguaño, pero que nel so momentu nun foi entendida en tola so estensión

00.30h La Salvaje. Fiesta. Stephen Hawkin  Experience + Ronny Rio dj

 

 

Domingu:

12h Teatru Filarmónica. LaSema (8-12 años)

13h Lata de Zinc. Vermú con The Human Jukebox

18h Teatru Filarmónica. La Plomada

Direutores: Luis Argeo, James D. Fernández

España | 2016 | 55’ | color | inglés, sotituláu n’español

Va años que'l cineasta asturianu Luis Argeo recueye nel so trabayu les buelgues de la emigración española y asturiana n'Estaos Xuníos. Argeo estrenó en 2006 la so primer película, AsturianUS a la que siguió Corsino, by Cole Kivlin en 2010. Al pie de James D. Fernández lidera'l proyectu archivísticu documental Nin flaires nin conquistadores: Spanish Immigrants in the US.Enllazando col so anterior trabayu, Un llegáu de fumu, West Tampa y Ybor City, nel estáu de Florida, son l'escenariu que la película convídanos a percorrer unes cais qu'allugaron les numberoses fábriques de tabacu que convertieron a esos llugares na capital mundial del tabacu”. La plomada apóyase nos relatos y alcordances de los sos habitantes d'orixe español (emigrantes asturianos na so mayoría), y nos vestixos d'una dómina y unes xentes que tán yá a puntu de desapaecer.

20h Teatru Filarmónica. La bahia

Direutor: Bruno Dumont

Francia | 2016 | 122’ | color | francés, con sotítulos n’español

Bruno Dumont plantega una comedia negra que nun dexa títere con cabeza. El retratu d'una familia burguesa de vacaciones nuna apacible villa cercana al mar, conviértise nuna esbarriada hestoria policiaca trevesada por un amor imposible. El gordu y el flacu o los Monty Python s'alíen con Buñuel pa dar llugar una peculiar traxicomedia, mientres los nuesos protagonistes desapaecen misteriosamente.


TSUNAMI XIXÓN anuncia 9 bandes más nel cartel

Redacción
Miércoles 8, Marzu de 2017, 7:16 pm

En cabeza d'estes confirmaciones, alcontramos a la banda sueca The Sounds, con un estilu inconfundible qu'entemez indie rock y electrónica, y que nos fadrá baillar ensin parar, una fórmula perfecta pa crear ésitos como “Tony The Beat”, “Painted By Numbers”, “Living In America” o “Non One Sleeps When I’m Awake”. Van presentar tamién el so nuevu trabayu, del cual yá conocemos el so primer single “Thrill”.


Un de los personaxes más queríos dientro del punk rock, el cantante de Lagwagon, Joey Cape, va actuar nel festival en solitariu interpretando los sos temes más populares y versiones que nos tien avezaos nos sos shows, amás de cantares del so últimu discu “Stitch Puppy”. De Portugal va llegar otru vieyu conocíu cola so banda paralela. Poli, cantante de Devil In Me, va actuar col so proyectu Sam Alone & The Gravediggers, folk bonrolleru pa tola familia y pa esfrutar con tolos amigos. Dende A Coruña, los míticos True Mountains tamién van faer apaición col so punk acústicu particular y van amosanos a qué suena'l so próximu álbum, el segundu de la so carrera. Dani Llames, tamién va venir a Xixón en solitariu dexando a un llau a la so otra pasión G.A.S. Drummers, y va deleitanos colos sos meyores ésitos como “Ecstasy” o “Hands To Wave”, ente otros. De la mesma, vamos tener a  The Garage Van, la banda local xixonesa que funde la sicodelia y el indie rock.



Dende la organización del Tsunami Xixón anuncien tamién la collaboración con Jägermeister pa programar conxuntamente bandes del programa Jägermusic nel eventu, coles mires de sofitar la escena musical underground estatal. Esti alcuerdu va dexar que 4 bandes Jägermusic toquen el sábadu nel escenariu que auspicia Jägermeister nel festival. L'escaparate de soníos urbanos de Jägermusic va venir encabezáu polos catalanes Los Tiki Phantoms presentando'l so nuevu discu “Aventures en celuloide”; Xardín de la Croix, yá confirmaos, y dos grupos emerxentes: Vulk, banda bilbaina con un directu demoledor cuyo cóctel d'influencies ye un amiestu de punk, new wave y power pop, y los madrilanos Favx, quien van descargar enerxía 90’s a ritmu de punk y post-hardcore.



D'equí a poco va anunciase tola programación distribuyida ente los cuatro escenarios que va tener l'eventu (unu na Plaza del Mayor, dos en La Llaboral y otru entá por determinar).

Les nueve nueves confirmaciones (The Sounds, Joey Cape, Los Tiki Phantoms, Dani Llamas, True Mountains, Sam Alone & The Gravediggers, Vulk, FAVX, The Garage Van) únense a les yá confirmaes ( The Offspring, Pennywise, Kadavar, Berri Txarrak, Toundra (con orquesta), Desakato, Sexy Zebras, Jardín de la Croix, Acid Mess)

Les novedaes nun se queden equí, porque'l festival va disponer de zona d'acampada oficial nel Camping Municipal de Deva. Con ufierta variada (espaciu pa tiendes, caravanes, autocaravanas o bungalows), va tener tamién un bus danzadera d'ida y vuelta hasta dichu recintu principal.


Pa tolos asistentes del festival, tamién se van disponer distintos descuentos en productos de Xixón Turismu na Xixón Card, na campaña Xixón Llambión y n'otros rellacionaos cola sidra. Más información sobre esto en www.gijon.info.


Pa rematar, ye importante señalar que la vienta d'entraes lleva un ritmu  perbonu, con casi'l 50% d'aforu vendíu en malpenes un mes, y con un gran porcentaxe de xente procedente de fuera d'Asturies. Recordamos que toes estes actuaciones tán incluyíes nel abonu del festival y que yá tán al preciu final a 39 €, llimitaes n'aforu, con posibilidá de que s'escosen enantes de llegar al festival.

La playa, la bona gastronomía asturiana, la bona música y unes bones vacaciones con amigos formen el Tsunami Xixón 2017 el 28 y el 29 de xunetu en Xixón.

 


1 | 2 | 3 | Siguiente » | Última »»

Últimas
Al azar

Hemeroteca

Buscador