Columnes


Felpeyu abre’l Festival Arcu Atlánticu soplando 25 veles

Raúl García
Miércoles 26, Xunetu de 2017, 6:33 pm

Había muncha gana yá de discu nuevu de los felpeyos y “Cerquina” ye un discu fechu sele pero con gustu, como casi toles coses bones de la vida. L’anterior discu “Canteros” ye del añu 2008 y estos 9 años hubo dellos cambios na formación, Senén Fernández sustituyó a Dudu Puente nel baxu y la voz y Fernando dexo’l grupu pa que garrase’l bouzuki Elías García.

Cerquina ye un discu que sigue col soníu felpeyu 100% pero qu’al mesmu tiempu incorpora nueves sonoridaes, sobremanera gracies a la voz de Senén Fernández. Delles igües bastante averaes al pop, canciones instrumentales tradicionales tamizaes pela peñera del grupu qu’ayer cumplía 25 años na Plaza Mayor de Xixón nun conciertu especial. Pa la ocasión rodiáronse de vieyos componentes y collacios del grupu como los hermanos ourensanos Cástor y Felix, Xel Pereda, Isidro Suárez, Xuan Nel Expósito, Ramón González Morán, Rubén Bada, Ángel Ruiz o la Banda de Gaites LaKadarma.

Temes clásicos del grupu como los “Fayeos de mayo” na voz de Xel Pereda con gran parte del públicu cantándola, ”Llevántate neña” o munchos del nuevu discu como “Escaecimientu”, “Ferreirín” o “Xota d’Igor”, n’homenaxe a Ígor Medio, miembru de Felpeyu bien d’años xunto con Carlos Redondo y fallecíos tráxicamente nun viaxe del grupu.

Les cuerdes de Moisés Suárez y Elías García faen una base rítmica tremendamente efectiva y que lleva la melodía perbien arropada, instrumentales como “Andaricas ya cacharros” con tres temes del vigulineru Lisardo Prieto o “Alboraes de Perlora” rescatando pal discu una alborada del repertoriu de gaita tradicional, son bona amuesa de que la música de Felpeyu va siguir faciéndonos disfrutar, esperamos que munchos años más.

La parte cantada axunta temes como “A la mar” una modernización con unos coros bien guapos de la tradicional “A la mar vanse los ríos” o “Ferreirín” cantada na variedá sur-occidental del asturianu que fala del despoblamientu de les zones rurales y esi sentimientu de señardá de los emigrantes, una idea tan clásica y al mesmu tiempu tan actual…

La parte gráfica del cd ta diseñada por Ruma Barbero (bodhran) con semeyes de la Ciudá Residencial de Perlora. La decadencia d’esta, cuento que ye la cara contraria de la situación del folk asturianu que pasín a pasu paez que revive. Les lletres del discu tan na so mayoría escrites tamién por Ruma Barbero, sacante un tema de Boni Pérez, un habitual nos discos de la banda xixonesa.

A pesar de tolos contratiempos na so llarga hestoria estos 25 años, Felpeyu amosó ayer na Plaza Mayor de Xixón dientro del Festival Arcu Atlánticu porque ye ún de los grupos punteros del folk asturianu y porque tien de siguir esistiendo. Capaz de llenar la plaza y abrir nuna nueche histórica'l Festival Arcu Atlánticu de Xixón qu’estos díes sigue con tola so programación. Llarga vida a Felpeyu!


Sociedá sorda

Xuan Porta
Sábadu 11, Febreru de 2017, 1:02 am

Hai una carauterística social que causa un trestornu a los ciudadanos faciendo que pierdan la tranquilidá, el bon humor, y la paciencia con un fechu insistente. 

El ruíu (del llatín rugitus). Esi soníu poco harmoniosu y poco prestosu que molesta, que cafia (como define’l DALLA) que tanto fadia. Como se diz nesta tierra hai muncha xente que Da más ruíu qu’un argayu, o seya que fala muncho y atropielladamente. La sociedá tá enllena d’interferencies en voz alta qu’afeuten a un procesu de comunicación serenu. Alcuéntrase llarada de soníos inarticulaos, polo xeneral desagradables, que causen fatiga, desazón ya inquietú. Exemplos del insistente desmadre acústicu hai munchos más.

 

Los motores de los vehículos, y los sos estridentes pitíos, l’eleváu volume de los televisores y les radios, los berríos de los neños consentíos, los glayíos de les tertulies familiares, los comentarios nos cines, les estridencies de los bares, los alborotos deportivos, el ruxíu de les fábriques nes periferies de les ciudaes, los lladríos de los perros mal enseñaos, l’escesu nos vatios de los conciertos, y asina, un cientu de circunstancies que devoren la convivencia engulléndola nun cúmulu de perturbaciones irritantes. Lo mesmo que Cronos devoró al so fíu. El ruxíu tragóse l’asertividá, p’alimentar al insomniu, la inquietú y l’ansiedá.

Y ye qu’esta sociedá tá sorda y nun escucha. La preba de que tamos no más alto d’esti ranquing ruidosu y nefastu pa la salú ye nidia y palmaria. Radica cenciellamente en cruciar les sos fronteres europees. Dende Francia, el paisaxe sonoru camuda por completu. Vuélvese más natural, más agradable, menos xabaz. N’Europa, acuéyese al silenciu. A ésti sí.

 


Celtic Connections 2017, el tema promete.

Raúl García
Martes 10, Xineru de 2017, 9:54 pm

Llega xineru, y a la ciudá escocesa de Glasgow entamen a llegar vuelos procedentes de toles partes del globu, con artistes dimpuestos a actuar n'algún de los munchos escenarios del Celtic Connections, un festival relativamente mozu y que cada añu abre más y más les mires en cuantu a xéneros de los grupos qu'actuen nél de la mano del so direutor artísticu Donald Shaw (conocíu pola so carrera en Capercaillie) y l'inmensu equipu de trabayu que forma'l festival. Al rodiu de 2100 artistes pasen del 19 de xineru al 5 de febreru per Glasgow pa mostrar el so trabayu en cerca de 300 eventos. Los númberos amuesen bien a les clares que nun ye un festival d'andar per casa.

En 2017 la representación asturiana nes tables del festival va ser escasa (pero non por ello menos relevante), Guillermo Pérez, xunto con Natalia Nuño y María Gavieiro d'Herbamora, van actuar con La Banda Europa, proyeutu del compositor y productor Jim Sutherland qu'amiesta músicos de toa Europa nuna especie d'orquesta de música de raigañu tradicional. L'apueste de la xunión y l'amiestu de la diferencia pa facer un proyectu común, que llevaba unos años paráu pero que resurde con ganes. Esta edición, col Brexit caliente na memoria, los conciertos de fusión de grupos cobren más fuerza que nunca, quiciabes como demostración.

Entrar a valorar grupos más o menos importantes ye bien difícil, y ye más cuestión de gustos. Si acasu hai ciertes feches bastante remarcaes bien pola dificultá de que se vuelvan a repetir o pola so emotividá. Nel primer casu rescampla'l tradicional conciertu d'una banda de gaites el sábadu, qu'esti añu xunta a Inveraray & District Pipe Band d'Escocia col Bagad Kemper de Bretaña, dos formaciones con bien de títulos a lo llargo de la so trayeutoria y una sonadía importante nel mundu de la gaita nel arcu atlánticu. El bagad bretón subirá al escenariu del imponente Glasgow Royal Concert Hall p'amosar l'espectáculu “Melezour” - del que ficimos una curtia reseña nel Festival de Lorient - pa dar pasu depués a la banda dirixida por Stuart Lidell y Steve McWhirter, pero de xuru qu'habrá sorpreses xuniendo les dos bandes n'algún momentu. El tema promete.

La carga emotiva llevala'l conciertu “A night for Angus”, homenaxe al fináu vigulineru Angus R. Grant. Los sos compañeros de Shooglenifty van arrodiase de convidaos y amigos pa facer una nueche a l'altura. Angus R. Grant morría a finales del añu pasáu dexando a la mítica banda coxa, ya qu’Angus yera l'autentitcu frontman del grupu escocés, persona mística y con unes idees musicales bien actuales qu'amestaba a la so formación como vigulineru de repertoriu tradicional de les highland. Esti gran esfuerzu por facer conciertos esclusivos pal festival, en forma agradecíos pol públicu.

Tamién, si por algo rescampla'l Festival Glaswegian, ye pol so apueste decidíu pola introducción d'otros estilos. El Celtic Connections nun ye un festival monotemáticu de lo que podemos llamar “música celta” -si ye qu'esiste esi xéneru fuera del términu comercial- si non que tamién aporten abondos grupos indie, pop, rock, jazz... Llama l'atención el pasu pol Connections del grupu americanu Calexico, que nesta ocasión va tar acompangáu d'amigos pa presentar “Across the borderline”, un trabayu que combina les músiques de los dos llaos de la frontera americana/mexicana. La representación americana nel festival ye bayurosa, col cantautor White Buffalo, los bluegrasseros Lindsay Lou & The Flatbellys o Hurray For The Riff Raff entre munchos otros.

Ye bien importante nel Celtic Connections l'apueste por grupos del país, bien seyan de folk: Aidan O'Rourke, Talisk, Ímar, Capercaillie... o d'otros estilos como Adam Holmes & The Embers, Rachel Sermanni, Admiral Fallow, Roddy Hart & The Lonesome Fire, dalgunos de los grupos más reconocíos del panorama rock o pop escocés d'anguaño.

El Danny's Kyle Open Stage, una muesa/concursu de grupos mozos homenaxe a un reconocíu cantante y dinamizador cultural de la música tradicional, del que salieron grupos anguaño punteros como Rura o Karine Polwart,  ye un escenariu interesante y pol que bien paga la pena pasar y qu'amás ye de baldre. Tien llugar nel Exhibition Hall del  Glasgow Royal Concert Hall.

Nun planu más nocherniegu y festivu tan les “Late Night Sessions” que tienen llugar na fábrica de cerveza Drygate o'l Festival Club que se celebra na escuela d'arte. Nun ambiente relaxao y más bien de jam session dellos de los músicos del día axúntense pa compartir música y echar una pinta colos collacios. Si acasu, les sesiones de Drygate tienen fama de ser más “relaxed” que'l Festival Club -  Investigaremos sobre esto-.

Como pasa en munchos festivales, dellos eventos tienen llugar al mesmu tiempu colo que de xemes en cuando faese perdifícil escoyer qué ver. Planificalo lleva tiempu, pero Glasgow ye una ciudá afayadiza pal visitante, y col programa completu en mano y una pinta en dalgún de los chigres de la ciudá, de xuru que topáis daqué que vos preste. Si non... siempre vos quedarán les cróniques de Vërtigu

 


¿Cómo sobrevivir al FIL sin morrer nel intentu?

Raúl García
Miércoles 20, Xunetu de 2016, 10:11 am

10 díes de festival, escenarios oficiales, un montón de carpes, conciertos y eventos a toes hores al mesmu tiempu en diferentes sitios de la ciudá...

Como sobrevivir al FIL sin morrer nel intentu?

FIL2016 

El Festival Interceltique de Lorient qu'esti añu cellebra la so 46º edición entá col estáu d'esceición declaráu en Francia, destaca sobremanera pola bayura de conciertos y eventos de distintu xeitu que pues topar, anque ye un festival focalizáu en grupos que podemos denominar folk o inclusu celta esto almite munches variantes d'estilos y d'unos años p'acá la organización tamién intenta averar a otru tipu de públicu con Simple Minds l'añu pasáu o cabeces de cartel pa esti añu como Joan Baez o The Corrs.

Nun perdese absolutamente nada ye misión imposible y vamos tener de facer una esbilla en cuantes a los nuesos gustos. Dientro de los diferentes escenarios del Festival, l'estadiu de fútbol de Mostoir acueye los espectáculos de les “Nuit Interceltique” onde ye posible ver nun recital una amuesa del folclor de tolos países representaos nel festival. Lluz, música, imaxe, y hasta pirotecnia faen d'esti espectáculu un “must” d'esos de ver una vez na vida. Tamién ye interesante pal públicu gaita-adictu'l Championnat des Bagadoù que nel marcu del festival cellebra la so fase final, na competición de primer grau podemos ver el nivel de creación y musicalidá de los bagadoù más potentes de Bretaña.

El Gran Teatru acueye bien de conciertos demientres los diez díes del FIL, y ye posible ver actuar n'él esti añu a la bayura de grupos australianos qu'actuen por ser la ediciòn dedicada a Australia. Va ser tamién l'escenariu que va recibir el domingu al Colectivu Muyeres presentando'l so espectáculu “País Malva” acompañaes na mesma nueche del perguapu grupu bretón Duo du Bas. Otros conciertos interesantes del mesmu escenariu son la presentación del nuevu discu del gaiteru Patrick Molard o “Melezour” el nuevu espectáculu de Bagad Kemper pa cellebrar los 70 años de Bodadeg Ar Sonerion, l'asamblea qu'arrexunta a tolos músicos de la práctica totalidá de los bagadoù.

El Palais de Congrés, asitiáu xusto ente’l  puertu de Lorient ye un poco'l centru neurálxicu de la organización del festival, onde hai taquilles pa poder mercar entraes a los distintos eventos, ye'l cuartel xeneral de la prensa de tolos países, y aparte d'ello sirve tamién como escenariu pa dellos conciertos como'l que van dar los asturianos Corquiéu o'l curdioneru Marcos García Alonso con “Errai”, una obra de composición formada por cuatro movimientos e interpretada por una selleición de musicazos de la escena asturiana. Acueye tamién como ye vezu tolos años el troféu MacCrimmon que cada añu axunta a gaiteros asturianos y gallegos compitiendo pol títulu enantes llamáu Macallan.

Al fondu d'esti mesmu puertu onde tan toles carpes de les diferentes delegaciones, incluyendo l'asturiana que por arte de maxa siempre acaba convirtiéndose nel pegollu de la folixa nocherniega, ta la Quai de la Bretagne, escenariu potentísimu del festival y onde podemos ver a los grupos más punteros de bretaña día tras día, la ufierta cultural nesti escenariu ye pa caer p'atrás, incluyendo un espectáculu esclusivu del FIL “New Leurenn #1” xuntando al baxista Julien le Mentec, veteranu na escena bretona con una montonera grupos como Tan ba'n ty, Regis Huiban Quartet, Landat-Moisson Quintet, Oliolio, con Korentin Le Davay, cantante del nuevu grupu Waz-Sav, un quintetu formáu por cinco mozos con munches ganes de facelo bien, veteranía y mocedá xuntes nel mesmu escenariu.

Al fondu del puertu a mano izquierda asitiase l'Espace Marine, carpa inmensa qu'acueye peles tardes espectáculos de grupos de toles delegaciones onde va actuar entre otros la banda de gaites invitada “La Laguna del Torollu” y el Grupu de Baille “Trebeyu” y peles nueches conciertos bien variaos, dende grupos bretones como Youn Kamm & Le Bagad du bout du Monde hasta The Corrs.

Como recomendación personal, fuera de la programación del festival pero complementándola tenemos el festival paralelu que tolos años entama'l chigre Tavarn Ar Roue Morvan, “Fest Ba'n Davarn”. El chigre folki por escelencia de Lorient, asitiáu más o menos ente la Quai de la Bretagne y l'Espace Marine, acueye tola selmana dellos conciertos perinteresantes incluyendo grupos que nun tan en otros escenarios, aparte de tener una ufierta perbona en materia de restauración.

Como veis, el Festival Interceltique de Lorient son diez díes mui intensos de música, folixa e intercambiu cultural con xente llegada de toles partes del mundu, una esperiencia inolvidable a la que vos convido a asistir, pero si nun podéis... tai al tantu de Vërtigu!


La cuenca de Tibu y el ratu de la otra

Calle Ne!
Domingu 20, Setiembre de 2015, 1:30 pm

Ama de casa, cincuetona y un pocu más, pero sobre too, internauta y bien puntera. Llevo yá metía en Internet enantes de que se punxera de moda nel bloque. Empecé como toes, dando-y la tabarra al mio nietu pa que m’enseñare a mirar les esqueles na web de la funeraria. Depués  yá empecé a defendeme yo sola. Miro’l cupón, voto les meyor vestíes nel Hola y miro los vestíos de novia de Cortefiel. Y asina paso la tarde, bobes. Y dende hai unos añinos pues toi metía en Facebook, que ye un sitiu gracies al que nun me fai más falta salir a la escalera pa bilordiar, porque toles fíes de les vecines ponen tolos díes les fotos de bodes, de romeríes faciendo como que escancien sidra y dos fotos del postre del menú del día, una d’ella y otra del mozu.

Pero eso, qu’agora que toi metía poles redes sociales, la conclusión a la que llego depués de too esti tiempu, ye que la gente ye fata. Aburríos de nun facer nada, agora lo que se lleva ye retase a ver quién ye más cafre. L’otru día salió el mio nietu corriendo de casa vestíu cola funda de trabayar del padre y díxome que tenía que facer el retu del Tibu y pregunte-y:

«¿Qué ye, que si’l Tibu se tira al ríu, tíreste tu detrás?». Yá vos respondo yo: Sí. Él y dos fatos más. Y si nun lo facíen, teníen que pagar una mariscada. El día que repartieron hosties na escuela, estos rapacinos taríen fumando en bañu. Creíame yo tranquila y a salvu por esto de la edá, cuando llegó’l día que la mio vecina, Deli la d’El mancu, díxome riendo que la so nieta nominóme. ¿Nominame a mí? Pos cuéntovos, yo nun seré tan cabrona como Deli, pero llista foi un cachu. Fixi’ll retu, pero al revés, grabéme comiendo una mariscada y reté a Deli, a la fía y a la nieta a que se tiraren al ríu, les mui goches. Indecentes que son, que dexaron morrer al güelu solu na habitación; que cuando tuvo malín falábame’l probe dende la cama pel patiu lluces cuando tendía la ropa de iviernu. Pero sigo colo de los retos que yo nun quiero méteme na vida la xente.

Parecía yá haber quedao to pa práu y agora, por una vez, lleguen los gringos más tarde que nosotros y empiecen a tirase cubos d’agua xelá. Tócate les narices. Como si nunca tuviéremos dío nosotres al Carmín de La Pola. Yá que no nos punxeron como retu facer moscancies, mayar mazanes o encontrar aparcamientu fuera de la zona azul, por seguir los vezos llocales. Vamos a ver, ye como si yo póngome a enseña-yos a ellos cómo bailar Coyote Dax ¡Nun pinto nada ehí metía! Pos nada, los gringos en too. Calderos pa un lláu, calderos pa l’otru. Y nun pienses que lo faen dos poligoneres de Wisconsin, non. Fíxolo hasta esti que foi presidente hai unos años. El de la Lewinsky non, el fatu esti que s’empapizó comiendo pastes de Les Arriondes.

L’asuntu ye que la moda volvió a España y yá lo ta faciendo too cristo. Pero cola que cuasi me revienta la faxa foi cola nieta Franco, qu’amás de facelo dende’l xalé esi robáu que tien en Galicia, en cuenta nominar a tres, nomina a cinco porque pa qué andase con fataes. Esta familia siempre per enriba, fía. Nun hai manera. Y pa más, ella sentada, espatarradona tan tranquila, que venga la chacha a tira-y-lu qu’ella parez que tien el ratu claváu a la tumbona, que nin pa un putu cubu d’agua se pon a trabayar. De xuru que tien a la rapaza esa en negro y pagada una miseria. Y seguro que ye nieta de dalgún fusilau…

Ai fía, yo yá nun toi pa más retos. Puedo retar a munches coses: a retar al sol que salga; a retar a les vecines que nun s’asomen al balcón cuando llega la mio fía col coche nuevu; a retar a los mios nietos a que nun garren el móvil mientres comemos… ¿Pero pa tírame agua frío? Xarru d’agua frío foi’l vídeu de la nietísima ¿Qué mayor retu hai que esi? 

 

 


1 | 2 | 3 | 4 | Siguiente » | Última »»

Últimas
Al azar

Hemeroteca

Buscador