La pelota nun se mancha - Pablo Moro


LA PELOTA NUN SE MANCHA. CAPÍTULU 3. HOLANDA – ESPAÑA. MINUTU 116

Pablo Moro
Martes 9, Xunu de 2015, 9:28 pm

Yo yá llorara. Cuando unos díes enantes l’árbitru pitó’l final del partíu de semifinales escontra Alemania, sentenciando per primer vegada'l pase a la final d’un equipu español, salí del bar nel que lu viera xunto a decenes de persones y sentéme, solu, nunes escaleres.Y lloré. Ente’l xaréu y l'allegría xeneralizada, ente los cánticos y les banderes, dalgunos averábense a min y entrugaben, con plasmu y dalgo de condescendencia, si yera verdá, si de verdá dalguién aparentemente sensatu y “con dos deos de frente” lloraba por un partíu de fútbol. Ya nun yera cosa de la victoria final amás: entá nun llevantáramos la copa y la caída podía ser terrible y dolorosa si, a la fin, los holandeses nos ganaben nel últimu partíu, la gran oportunidá perdida, la miel nos llabios.

Ya pudiera fala-yos, entós, a aquellos que nun talantaben les mios llágrimes, de los dos díes d’entrenamientu selmanal y el partíu de los fines de selmana, per tantos años; del fríu y el barru, n’Infantiles, nel campu de la Peña Berto, onde deprendí lo que yera’l dolor. Gustaríame desplica-yos el fonderu conocimientu que mio ma garrara del balompié al traviés d’años de comides y sobremeses énte’l so maríu y los sos tres fíos varones. Tendría que recorda-yos les palabres que mio pá me dicía siempres, enantes y depués de los partíos (“pelea, trabaya”) o lleva-yos al únicu día que prometió dame, mio pá digo, mil pesetes si marcába un gol nel partíu al que me llevaba y perdimos 21-1. Debería enseña-yos los montones de cromos repetíos, les botes rotes, les milenta cicatrices de les mios piernes. Ya pudiera fala-yos de mio mesmu. Pero quedé ellí dándo-yos, cobardemente, la razón cola sorrisa, secándome la cara y sintiéndome un estúpidu.

Por eso, cuando’l tiempu se paró nel minutu 116 de la final, y l’estadiu Soccer City de Johannesburgo s’asemeyaba al centru del universu y la bota d’un chaval de Fuentealbilla yera l’Aleph onde cabíen el tiempu y l’espaciu, supi qu’aquello nun yera pa tanto. Yo ya llorara cuando había que llorar: nel momentu en que comprendí que muncho más valioso que ganar ye, simplemente, tener, dalguna vez, la oportunidá de ganar.

Sobremanera cuando'l tiempu pasa y vamos perdiendo tanto

 


La pelota nun se mancha. Cap1. Centru Asturianu-Veriña

Pablo Moro
Miércoles 11, Avientu de 2013, 12:51 pm

Tendría yo unos nueve años y xugaba dende diba meses nel equipu de fútbol sala del Centru Asturianu d’Uviéu. Entá nun había competiciones oficiales nin lligues, que yo m’alcuerde, pa neños d’esa edá y la nuestra aspiración competitiva centrábase básicamente en pequeños torneos de duración curtia y partíos amistosos puntuales. De fechu, l’equipu onde xugaba nun yera un club propiamente dichu, sinón una escuela de fútbol, un sitiu onde díbemos aprender el significáu de términos como compañerismu o esfuerzu. Nun había botes llamatives nin celebraciones estravagantes de goles. Yéremos neños corriendo detrás d’un balón, vistíos colos mesmos colores, defendiendo quién sabe qué, calzaos con unes Amat Marco negres. Yo yera, amás, el capitán, significara lo qu’eso significara.

 

Entá pueo ver y sentir la lluz cálido y débil del sol cayendo sobre la pista, polo que deduzo que yera de setiembre aquella tarde na qu’un poderosu Veriña de Xixón nos endosaba un aplastante 0-3 na primer parte. El Veriña yera, pa mi, un equipu temible. Coles sos precioses camisetes coloraes y negres, al estilu del Milán, los sos xugadores demostraben un llamativu talentu pa mover la pelota. El so físicu más desarrolláu y corpulentu paecía nun corresponder cola so edá y ganábennos en tolos aspectos del xuegu. Inclusive, la balanza sicolóxica decantábase al so favor: los del Centru Asturianu siempres fuimos consideraos ¨los pijos¨ y eso animaba a los nuestros contrarios, igual qu’animó a David escontra Goliat. Llamentablemente, les apariencies engañaben de nuevo, y ellos yeren, ensin dulda, el poderosu xigante con toles de ganar.

 

De la segunda parte nun recuerdo cuasi nada. Namás me queden les felicitaciones por remontar el resultáu (acabemos ganando 4-3), a base de correr y peliar, más que nunca en tola mio vida y una cantimplora en metá del desiertu; un afalagu d’un home que presenciara la nuestra fazaña y la cara de mios padres caminando rápido hacia’l banquillu, mostrando la satisfacción de ver al fíu pequeñu aprender, pela primer vegada, dalgo por sí mesmu.

 

Y recuerdo, sobre too, aquella lluz resbariando pela mio cara, secándome’l sudu, y el corazón recuperando’l ritmu, mientres sentía nel pechu l’inmensu poder de tolos significaos de la palabra arguyu.


Últimas
Al azar

Hemeroteca

Buscador