Nun sei, pero sea - Mónica Rodríguez Riesgo


L'arte de la belixerancia

Mónica Rodríguez Riesgo
Martes 2, Setiembre de 2014, 5:10 pm

Los humanos cavilamos dende que tenemos la conciencia, ou meyor, la certeza de ser seres sociales, sobre la responsabilidá civil,  la conciencia de clas,  lo particular ya lo xeneral,  lo individual ya lo colectivo, la moral ya la ética. Concibiendo nas nuesas cavilaciones respuestas distintas pa conflictos relativos al tiempu que constituyentes.

 

            Todas estas reflexones subxectivas articúlanse las más de las veces (con matices, caro ta) en sistemas (ya hasta doctrinas) políticos, filosóficos, sociolóxicos, psicolóxicos ya hasta l.lingüísticos, nun vos digo más, se non que-y lo digan a Chomsky...

 

            Pergúntome a veces eso sí, se la tendencia a buscar amparu na holística nas sus manifestaciones distintas nun yá a veces una forma de renuncia a la belixerancia, a la responsabilidá individual sobre'l bien colectivu, al individualismu, que tantu noxu da cumo articulación del capitalismu, pero que bien puede entendese dende un puntu de vista solidariu, cumo hai abondu tiempu descubríu l'anarquismu individualista,  non necesariamente «egoísta».

            Pergúntome s'escondese en proclamas, manifestaciones ya pancartas colectivas nun yá a veces una forma d'expurgar la culpa al modu que lo fai'l catolicismu, mediante la fe ya non mediante las obras. Pergúntome se la concurrencia competitiva n'actos sociales puntuales nun yá equiparable al protocolu de  la misa de domingu.

            Pergúntome se nun yá más honesto faer el bien: practicar un sistema de valores más natural ya rudimentariu basáu nun instintu personal empático-solidariu minimalista, que nun atenda a estéticas ya sí a éticas, que nun se base na especulación nin no rendimientu social en cuanto a valoraciones de grupu...  que basar la existencia no sensacionalismu.

            Pergúntome se la persona qu'abraza precocinaos ya refritos públicamente val más en términos cualitativos, que la qu'intrahistóricamente los materializa cada día viviendo amodo, sin falta de parafernalias ya rebelicoques, que nun deixan de ser formas imprecisas frente a fondos fondos, tan fondos que nun tienen nin estructura.

            Pergúntome se yá más d'amirar el burgués que se redime na metafísica que la persona que materializa la su integridad moral a lo Thoreau, tirándose al monte. 

 

            Ya pergúntome todo esto, porque sintí l'outur día na televisión, que nun constitúi de facto niún argumentum ad verecundiam, pero qu'ahí ta, que sociolóxicamente ta demostrao que cuando un individuu s'enfrenta a un conflictu ayén nun contextu social deriva la responsabilidá al grupu, eludiendo l'actuación, mientras que cuando nos enfrentamos en «solidariu» la moral (cuando se tien, nun hai qu'obvialo) impélete a responsabilizate del mal ayén ya actuar.


Porque la melancolía tamién yá arte

Mónica Rodríguez Riesgo
Vienres 31, Xineru de 2014, 1:45 am

Nun sei se de la denominación d'orixe puede faese un pretextu pa xustificar toda una restrayada de continxencias comunes na vida d'una persona.

             Pero'l casu yá que l'occidente d'Asturias, sea polas casas caídas, sea polos pueblos abandonaos ya hasta muertos, no sentíu más plenu de la palabra; sea polo malo del tarrén ou polo duro del trabayu ou pol excesu de buelos ya merma de nietos ou pola falta d'ambientes urbanos ou pola l.luz mariel.la ya cenicienta ou por que sí, que tamién sea; guarda un halu de melancolía que vei inscribiéndose na memoria colectiva de xeneración en xeneración, afianzando un talante innatu ya propiu a los que nos l.lugares que compriende esti territoriu nos alcontramos.

             Yá por eso, que nun me choca nada qu'un home de la nuesa contorna acabara siendo por méritu ya repetición el prototipu de la cara más amarga del spaghetti western, tou falando, nun hai duda, del más cinematográficu de los nuesos emigraos trunfantes, tou falando de Francisco Braña Pérez.

             Francisco Braña Pérez nacéu'l 26 de febreiru de 1934 en La Puela (Ayande), fíu d'un peluqueiru ya un ama de casa, naturales de Folgosa ya Malneira (Grandas), conveníos a travesar El Palu p'acó en busca d'un futuru meyor, igual que más tarde lo fairía'l sou redrueyu.

         Frank Braña  Chócame particularmente esti home porque la súa traxectoria foi, cumo pouco, casual, ya muestra inequívoca de las posibilidades qu'esti entornu nuesu, que tan despreciatible se nos fai a pedazos, da d'una manera ou d'outra.

             Foi Frank Braña, (Paco Braña, Paco'l de La Puela, Paco'l del peluqueiru, el fíu Avelino ya Julia... en reconstrucciones a lo menos probables, anque non suficientes), un home que feixo de los determinantes naturales del sou orixe los distintivos de la su carrera, asina, perfilóuse cumo anónimu nos créditos, afirmándose na humildá ya'l pasu sele pola galería del tipu rural; l.lucíu apariencia desconfiable, dura ya gafa, valiéndose de tres de las variables que más gasta'l paisanu, xéneru esti que más qu'una categoría, yá una casuística nestas tierras nuesas ya, yá p'acabar, «morréu con dignidá», cumo bien reza la su biografía, cualidá esta non pouco valorada nun sitiu, l'occidente d'Asturias, nel qu'hasta pa morrer hai qu'a-sumise a un protocolu de conducta bien filtráu pola moral dominante.


Últimas
Al azar

Hemeroteca

Buscador