Mecigayu


I Congresu Internacional 'Gaites nel mundu'

Raúl García
Miércoles 19, Xunetu de 2017, 4:50 pm

Nava vien siendo dende va años el sitiu onde a la gaita se-y da la importancia que, más pa mal que pa bien nun se-y da n’otros conceyos d’Asturies. La Escuela de Música de Nava entama dende’l 18 de xunetu el  “I Congresu Internacional Gaites nel Mundu: 1917 – 2017 – 2117” , y que se ta desendolcando estos díes en diferentes escenarios de la capital naveta.


La tarde del martes 18 entamaba con una conferencia del profesor de musicoloxía na Universidá d’Uviéu, Ángel Medina, autor del estudiu sobre la misa de gaita y que detalló dellos puntos d’interés sobre’l tema. Darréu, una mesa redonda onde Chus Pedro, Hugo O’Donell, Jose Angel Hevia, Ramón Prada, Xuan Bello y Xune Elipe aldericaron y charraron acerca de lo que ye la gaita y a ónde tien de dir. L’alderique tuvo sirvíu y fízose una bona conversación sobre dellos puntos de vista al fin y al cabu paecíos sobre’l tema.

La gaita asturiana nun sólo ye un instrumentu musical más, la gaita n’Asturies ye una seña d’identidá y como tal tien munchu más significáu.

La necesidá d’apueste políticu pa meyorar les condiciones, la llingua como exe vertebraor y el sofitu al mundu cultural asturianu  del que la gaita forma parte cimera dende instituciones publiques y privaes, podríen ser les conclusiones de la tarde.

Y van siguir les actividades estos díis en Nava con una montonera xente aldericando al rodiu de cuestiones diverses como la perspectiva de xéneru, el feminismu o la creatividá pero siempre rellacionándolo cola gaita, o con cuestiones como la gaita y la emigración asturiana, tan importante en tola hestoria d’Asturies. Ye imposible concretar el mundu de la gaita asturiana sólo nes lleendes polítiques de lo qu’anguaño ye’l “Principáu d’Asturies” y ello llévanos a bien de matices perinteresantes na forma de ver la música.

La entrega del premiu de percusión “Manegueru de Nava” a María Isabel López Parrondo pola so llabor nel sur-occidente principalmente y a Ricardo Moreno, “El colchoneru”, por toa una vida dedicada al tambor asturianu, tien llugar tamién dientro de los actos del congresu. Muestres artístiques de los artistes del conceyu y conciertos d’Odón García y Fonsu Les Regueres, Cantaruxare o L-R, completen la programación d’esti I Congresu qu’esperamos que nun quede nel escaezu como yá paso coles Xornaes de Música Tradicional de Nava.


Lorient 2017. Vamos p'allá!

Raúl García
Vienres 14, Xunetu de 2017, 1:07 pm

Festival Interceltique Lorient 2017

Mochila? Gafes de sol? Ganes de conciertos? Vamos p’alla!

Queda bien poco yá pa qu’entame la 47º edición del Festival Interceltique de Lorient,  que resiste’l pasu de la crisis nel mundu de los macroeventos musicales con una combinación bastante bien acertada de clásicos y novedaes. El Festival de Lorient foi galardonáu l’añu pasáu como meyor festival urbanu de Francia y ye una de les grandes cites del branu nel estáu francés, qu’atrái hasta Lorient a xente llegao dende tolos requexos de Bretaña, Francia y toa  Europa.

Esti añu'l FIL ta dedicáu a Escocia, un país con una escena musical bien puxante, sobremanera na so capital o na ciudá de Glasgow. Quicias Glasgow ye una de les ciudaes europees con más llocales de conciertos qu’ufierten una programación añal mui grande en cuantu a feches y estilos. Falar d’Escocia ye traer a la mente grupos punteros como Simple Minds, Franz Ferdinand o más averándonos al folk Capercaillie o The Tanahill Weavers. Ensin duda, Escocia sabe potenciar perbien la so industria musical con una rede de centros d’enseñanza profesionales, festivales y grupos profesionales y amateurs que texen un gran atractivu turísticu y económicu pal país. Yá quixéramos n’Asturies…

El FIL sigue teniendo cites clásiques dientro de la programación como son la Grande Parade des Nations Celtes, un desfileque’l primer domingu enllena la ciudá de grupos de baille y bandes o les Nuit Magique que tienen llugar nel Stade du Mostoir, esti añu cola representación asturiana de la Banda de Gaites Candás y el Grupu de Baille Xeitu d’Uviéu. Tamién atraen bien de xente les fest-noz que tienen llugar toles nueches na Salle Carnot, onde se suceden una tres d’otra actuaciones de pareyes de biniou – bombarda, dúos de cantantes, tríos… y que son l’esponente máximu del baille en Bretaña. Referentes de les nueches en danza asturianes, naguamos porque dientro d’unos años el panorama n’Asturies podamos observalu de la mesma mena qu’ellí, onde’l baille tradicional ta vivu y de plena actualidá. Nun ye difícil ver nel mesmu corru mozos y moces ventiañeros compartir baille con xente bien mayor y qu’esto tenga llugar de manera totalmente natural.

En cuantes a la ufierta de grupos, la programación del FIL tien cabeces de cartel pop-folk escocés como Amy MacDonald (conocía equí va unos años pola so canción “This is the life”), RunRig, el gaiteru asturianu Hevia que presenta pa la ocasión un conciertu de fusión astur-caribeña y que va compartir nueche con The Celtic Social Club nel Espace Marine o los escoceses Capercaillie.

Como otres propuestes interesantes podemos citar varies, los bretones Fleuves, grupu revelación del añu pasáu en Bretaña y que vien de ganar el premiu “Coup de coeur du jury” de los Prix Musical Produit en Bretagne 2017 pol so álbum epónimu “Fleuves”. Son un tríu compuestu por Emilien Robic al clarinete, Romain Dubois a les programaciones y el rhodes y Samson Dayou al baxu llétricu. Un grupu con una propuesta musical atípica y novedosa nel panorama, que revolucionó les fest-noz con un propuesta bastante llétrica, valiéndose pa ello de la especial sonoridá del pianu Rhodes sofitáu pol baxu llétricu y el clarinete llevando la voz cantante nel grupu. Nun pierden pa nada la conexón col mundu tradicional y ponen el pie a tierra de llenu nel repertoriu de baille. Si hai una pallabra que los define, ensin nenguna duda ye “groove”.

Una de les ocasiones más prestoses pa velos quicias seya l’espectáculu de producción propia del FIL “Honneur au Fest Noz”, onde van compartir escenariu con Amieva, grupu bretón con presencia asturiana, Barba Loutig, cuartetu vocal femenín bretón y l’amiestu entre la Orquesta Sinfónica de Bretaña y el dúu formáu por Erwan Hamon (bombarda) y Janick Martin (curdión). Ver una orquesta sinfónica conduciendo por exemplu una gavotte nun ye lo más común, y la combinación fai un conciertu dignu de marcar n’axenda del festival.

El Bagad Cap Caval, ún de los que siempre tan nel xuegu por alzase col troféu de campeón del Championnat des Bagadoù, presenta tamién nel FIL el so caberu espectáculu “Tan de’i”. Acompañaos de les voces de Barba Loutig y Phil’Armorik Orchestra amuesen el bon facer del bagad bigouden, melodíes tradicionales sumaes tamién a composiciones propies de dellos miembros del bagad como Tangi Sicard o Sylvain Hamon pa esti proyectu que vien a continuar el camín de los espectáculos anteriores (Hepken, Ijin y Ololé) y que sigue pela mesma sonoridá propia de la banda. Una banda con identidá propia y definía col so soníu que lleva la so propuesta elegante y de trabayu al Teatru de Lorient.

La carpa de Bretaña, asitiada al final del puertu acueye bien d’eventos interesantes como’l Trophée Loïc Raison, el concursu Kitchen Music o conciertos toles nueches. Grupos interesantes pa ver nesta carpa hai munchos y d’estilos variaos tola selmana, grupos mozos como Talskan o C’harr Nij pero tamién grupos más maduros como podría ser el casu de Yann-Fanch Kemener, Ndiaz, Karma, Skeduz, Söig Siberil o Oliolio.

Oliolio ye una referencia siguir dende que nel 2014 se xuntasen Julien Le Mentec al baxu, Erwan Volant a la guitarra, Gweltaz Rialland al saxo y Stevan Vincendeau cola curdión. La llista de grupos onde tocaron caún d’ellos sería enforma llarga anque sería una muestra de grupos bien interesantes por demás. Seguramente poles múltiples obligaciones de toos en otros grupos, Oliolio nun ye de los grupos con más feches nel calendariu, pero musicalmente son una referencia. Sorprenderán pa bien grabando discu un añu d’estos? Mentanto queda velos en direutu.

Al tar dedicada esta 47º edición a Escocia, la muestra de grupos d’aquelles tierres ye más importante qu’otros años. L’Espace Marine dedica varies nueches a la música escocesa y na Soirée d’Ouverture Écosse va poder disfrutase de la música de la moza Mischa Macpherson en formatu de trío (gran promesa del cantu gaélicu ganadora de dellos reconocimientos nos MG Alba Scots Trad Music o nos BBC Radio 2 Young Folk Award) o The Elephant Sessions de los que yá ficimos revisión na crónica del Celtic Connections cola so fusión de folk llétricu. Na nueche del llunes 7 d’agostu, Blazzin Fiddles, Capercaillie o Breabach acompañaos tamién d’unos más mozos Fara o Talisk subirán al escenariu y ensin duda faerán una nueche memorable. Vien pegando fuerte la representación escocesa

Tamién rescampla l’homenaxe a Gordon Duncan, ún de los gaiteros escoceses más mediáticos de les últimes décades. Esti gaiteru marco época non sólo n’Escocia y coincidiendo col 12º aniversariu de la so muerte dellos alumnos, collacios y gaiteros en xeneral como Hervé Le Floc’h, Fred Morrison, Ross Ainslie, Ali Hutton, el so hermanu Ian Duncan o’l gaiteru asturianu José Manuel Tejedor xúntense p’alcordase del gran maestru.

Anabel Santiago, Dixebra, Vicente Prado Suárez “El Pravianu” y los cuatro concursantes del Trophée MacCrimmon, Jesús Álvarez, Jaime Álvarez, Fernando Cárcaba y Xermán Álvarez zarren la representación asturiana amás del yá citáu Jose Ángel Hevia, la Banda Gaites Candás, y Xeitu.

Al marxe d’estos grupos citaos como recomendación, convidámosvos a echar un vistazu al programa completu del festival y dexavos llevar. Pa los que nun puean asistir, voi intentar averar un poco de lo que pase eses feches na ciudá hasta vërtigu.  Mochila? Gafes de sol? Ganes de música? Vamos p’alla!


Entama la matriculación pa los cursos de la UABRA

Redacción
Miércoles 17, Mayu de 2017, 5:31 pm

Estil lunes 22 de mayu entama’l plazu p’apuntase a los cursos de la Universidá Asturiana de Branu entamaos pola Academia de la Llingua Asturiana y la Universidá d’Uviéu. Toles persones que tean interesaes van poder matriculase en dalgún de los cursos hasta’l vienres 2 de xunu, n’horariu de:  Llunes a xueves de 9 a 15 hores y de 16 a 19 hores y Vienres de 9 a 14 hores, na sede de l’Academia de la Llingua (C/L’Aguila, 10 –Uviéu) (tfnu 985 21 18 37)

Pa la matriculación, síguese un orde rigorosu d’inscripción. Amás del importe de la matrícula y una semeya, hai qu’enllenar tamién l’impresu de matriculación que se facilita na Academia.

Nesti añu 2017,  habrá cursos dende’l 31 de xunetu al 11 d’agostu, y van desendolcase, como nos caberos años, en Cangas del Narcea.

  • Cursu Elemental de Llingua Asturiana, 60h (del 31 xunetu al 11 d’agostu)
    Empobínase a toles persones, al marxe de la so titulación o nivel d’estudios, y tienen como oxetivu algamar una conocencia básica de la llingua na espresión oral y escrita.
  • Cursu Avanzáu de Llingua Asturiana, 60h (del 31 xunetu al 11 d’agostu)
    Va dirixíu a aquelles persones que superaren l’anterior Cursu Elemental o que, al traviés de les pruebes de xineru o mayu, algamaren el certificáu de Conocencia Básica de la Llingua Asturiana. El so oxetivu ye que tola xente, al marxe del so nivel d’estudios, titulación o profesión, pueda llograr una más fonda conocencia práutica de la llingua asturiana

  • Cursos de Capacitación en Gallego-Asturiano (Primeira Fase), 60h (del 31 xuyín al 11 d’agosto)
    Este curso é a primeira das tres fases das que se compón el Programa de Capacitación en Gallego-Asturiano pra profesores qu’a Conseyeiría d’Educación y Ciencia del Principao d’Asturias encomendóu al Academia de la Llingua Asturiana. Esta é a titulación oficial que s’esixe pra impartir el asignatura de Gallego-Asturiano en Educación Primaria y Secundaria. Os destinatarios (másimo 15 prazas) son profesores d’Educación Primaria y Secundaria (neste casos llicenciaos en Filoloxía). Pra fer el curso hase a ter que superar úa proba escrita/oral de Gallego-Asturiano

  • Capacitación pa la Traducción al Asturianu, 35h  (31 de xunetu al 5 d’agostu de 2017).
    Esti cursu, qu’empobina Marta Mori d’Arriba, tien como oxetivu presentar sintéticamente los presupuestos teóricos que rixen la traducción a una llingua minoritaria. El trabayu d’aplicación al casu asturianu ye dafechu práuticu y nél tendráse en cuenta, de mou especial, l’exerciciu de tornes de testos lliterarios y periodísticos y de testos llegales y científicos. Nel programa formativu tamién participen como profesores Cristina Valdés Rodríguez, Alberto Fernández Costales y Héctor García Gil.
  • Nueves teunoloxíes na educación, 35h  (31 de xunetu al 5 d’agostu de 2017).
    El cursu, dirixíu por David Melendi Palacio, tien como oxetivu cimeru que l’alumnáu conoza delles aplicaciones educatives de llibre distribución aplicables a la docencia y ver el so emplegu nun entornu académicu. Nel programa formativu participen como profesores Xulio Berros Reinoso y David Guardado Diez.

  • Cantares, bailles ya instrumentos musicales asturianos, 35h  (del 7 al 11 d’agostu de 2017).
    Esti cursu, dirixíu por José Ignacio Suárez García, afonda nel conocimientu de los cantares, bailles ya instrumentos populares asturianos dende la perspeutiva de la so presencia na escuela. Nel programa formativu participen como profesores Héctor Braga Corral, Covadonga González Muñiz, Xosé Antón Fernández Martínez «Ambás», Ramsés Ilesies Fernández y Llorián García Flórez.

  • Averamientu nel cine n’asturianu, 35h  (del 7 al 11 d’agostu de 2017).
    L’oxetivu d’esti cursu, empobináu por Próspero Morán López, ye averase a la realidá de la producción audiovisual n’asturianu al traviés d’un percorríu peles películes y los curtiometraxes fechos na nuesa llingua, asina como conocer (y ellaborar práuticamente) un proyeutu específicu de realización audiovisual. Nel programa formativu participen como profesores l’actriz María Cotiello Pérez y el realizador Pablo A. Quiroga Prendes.

Xeres complementaries UABRA 2017

CONFERENCIES

Martes 1 d’agostu 19:00 h. – Salón d’Actos de la Escuela-Hogar

«El Desterrado. Poder, historia e relato nel Alto Navia»

José Antonio Álvarez Castrillón (Doctor n’Historia. Profesor Ayudante Doctor del Dept. de CC.EE. de la Universidá d’Uviéu).

 

Xueves 3 d’agostu 19:00 h. – Salón d’Actos de la Escuela-Hogar

«Lliteratura y movimientu de vindicación en Lleón»

Xairu López (Asociación Cultural Faceira).

 

Martes 8 d’agostu 19:00 h. – Salón d’Actos de la Escuela-Hogar

«¿Ciudá Astur o acabar con ASturies?»

José Alba Alonso (Doctor en Ciencies Económiques y Empresariales. Profesor Titular del Dept. d’Economía aplicada de la Universidá d’Uviéu).

 

Xueves 10 d’agostu 19:00 h. – Salón d’Actos de la Escuela-Hogar

«L’AVE a Asturies: serviciu públicu y ecoloxía»

Paco Ramos (Portavoz d’Ecoloxistes n’Aición d’Asturies).

 

MÚSICA

Miércoles 2 d’agostu 22:30 h. – Teatru Toreno

Actuación de «Corquiéu».

Miércoles 9 d’agostu 22:30 h. – Teatru Toreno

Actuación de «Tuenda».

 

ESPOSICIÓN
Na Casa de la Cultura «Palaciu d’Oumaña» de Cangas

Del 31 de xunetu al 11 d’agostu. «Quixote ilustráu» de Juan Hernan / Universidá d’Uviéu y Ediciones Laria

 

Estos Cursos tienen reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como “Entidá Organizadora d’Actividaes de Formación Permanente del Profesoráu”. Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies


Lletres, femenín plural. Actos institucionales de la 38 Selmana les Lletres

Redacción
Vienres 21, Abril de 2017, 4:43 pm

Xueves 27 d’abril. Día de les Lletres nel exterior

20h. Centru Asturianu de Madrid

  • Presentación-coloquiu del llibru “Escritores asturianes. Antoloxía de testos n’asturianu y gallego-asturianu”
  • Actuación d’Anabel Santiago 

 

Martes 2 de mayu

10-12h Uviéu. Xunta Xeneral

  • Visites escolares guiaes en llingua asturiana y gallego-asturiano.

10-14h Xixón. Cimavilla

  • Visites escolares guiaes pel barriu de Cimavilla

12h Uviéu. Xunta Xeneral

  • Llectura pública institucional de testos n’asturianu y gallego-asturianu

19.30-21h Xixón. Cimavilla

  • Visita guiada pel barriu Cimavilla. (Máximu 25 persones. P’acutar: 985106741 o splnormalizacion@asturias.org dende’l llunes 24 al vienres 28)

19.30h. Uviéu. Auditoriu (Sala de Cámara)

  • Muyeres y lletres. Actu homenaxe a les escritores asturianes.
  • Llectura dramatizada de restos escritos por muyeres (Con Carla Loga y Ernesto González como actores, acompañaos por Amparo Antuña al pianu)
  • Actuación d’Anabel Santiago

Miércoles 3 de mayu

10-14h Uviéu. Cascu históricu.

  • Visites escolares guiaes

18-21.30h. Corvera

  • Versovera. Atopada poética de Corvera (En colaboración cola Casa de la Llingua-SNLl de Corvera)
    • De 18 a 19.30h nel Centru Cultural de Cancienes
    • De 20 a 21.30h nel Centru Cultural de Les Vegues

19.30h-21h. Uviéu. Cascu históricu

  • Visita guiada pel Cascu históricu d’Uviéu. (Máximu 25 persones. P’acutar: 985106741 o splnormalizacion@asturias.org dende’l llunes 24 al vienres 28)

19.30h. Grau. Capiella de los Dolores. (En collaboración cola Fundación Aula de les Metáfores)

  • Llectura poética al cargu d’Ángeles Carbajal, premiu “Xuan Mª Acebal” de Poesía 2016.
  • Entrega de diplomes del “IV Premiu de Poesía Selmana de les Lletres”, p’alumnáu del conceyu de Grau.
  • Actuación musical d’alumnáu del Conservatoriu Superior de Música Eduardo Martínez Torner

Xueves 4 de mayu

12h. Avilés. Plaza Domingo Álvarez Acebal

  • Inauguración de la V Feria del Llibru y Discu n’asturianu.
  • Presentación del llibru “Escritores asturianes. Antoloxía de testos n’asturianu y gallego-asturianu”

La Feria va tar abierta de xueves a sábado de 11 a 14h y de 17 a 21h. El domingu de 11 a 19h

18h Xixón. Teatru de La Laboral

  • Gala d’entrega de los premios del IV Certame de teatro escolar en llingua asturiana y gallego-asturianu. Cola representación d’obres premiaes y la entrega de premios en toles categorías.

Vienres 5 de mayu. Día de les Lletres Asturianes

12h Mieres. CP Santiago Apostol

  • Actu escolar institucional de celebración de la 38 Selamana de les Lletres Asturianes.
  • Intervención d’autoridades
  • Estrega de premios del XXII Certame de creación artística /lliteraria, XIV Certame de Cartelismu y VI Certame de Creación Audiovisual.
  • Actuaciones

Sábadu 6 de mayu

19h A Caridá. Auditoriu da Casa das Quintas

  • Homenaxe ás nosas lletras.
  • Espectáculu musical País Malva, de Muyeres.

Llunes 8 de mayu

11h Xixón. Teatru de La Llaboral

  • Espectáculu “Histories detectivesques”, de Guayominí Producciones, p’alumnáu de Primaria

19h Corvera. Centru Sociocultural de Les Vegues

  • Representación teatral de “Yeren dos guah.es…(Los versos de Vitor Manuel como obres de teatro”, al cargu de los Talleres de teatro p’adultos de Corvera.

Martes 9 de mayu

11h. Xixón. Teatru de La Llaboral

  • Espectáculo “Disculpe, caballeru”, de ZigZag Danza, p’alumnáu de Secundaria.

19.30h Uviéu. Sala Borrón

  • Entaína a escribir. Segundu concursu de microrellatos improvisaos n’asturianu pa xente mozo

 

 


Alejandro Díaz Castaño ye'l nuevu direutor de Festival Internacional de Cine de Xixón

Redacción
Xueves 16, Marzu de 2017, 4:02 pm

Alejandro Díaz Castaño ye'l nuevu direutor de Festival Internacional de Cine de Xixón.

Dempués de meses d'espera, dempués de concursos y reconcursos, el FICX tien por fin nueva dirección. El xixones Alejandro Díaz Castaño, que ta acabantes de presentar el so nuevu trabayu IHESA /LA FUGA na Selmana del Audiovisual Contemporaneu d'Uviéu (SACO), va faese cargu del timón del Festival de Cine de Xixón nes próximes ediciones.

Alejandro Díaz Castaño yá trabayara nel FICX na dómina de Cienfuegos y na actualidá exercía de Programador del Festival Européu de Sevilla.


1 | 2 | 3 | 4 | 5 | 6 | Siguiente » | Última »»

Últimas
Al azar

Hemeroteca

Buscador