musica


I Festival de Cultura Urbano de Samartín

Xicu Ariza
Vienres 14, Xunetu de 2017, 3:40 am

Esti sábadu 15 celébrase en L’Entregu el “Primer Festival de Cultura Urbano de Samartín del Rei Aurelio”

L'asociación xuvenil Que Nun Apare! entama nel colexu públicu El Coto esti eventu qu’axunta deporte, danza, talleres y música

Esti añu en L’Entregu les tradicionales fiestes de La Laguna tán nel aire énte la falta de Comisión de Festexos, pero esta llocalidá de Samartín del Rei Aurelio nun va quedar quieta. L'asociación xuvenil Que Nun Apare! decidió dar un pasu alantre pa enllenar el vacíu cultural existente -sobremanera pa la mocedá- y por eso'l sábadu 15 de xunetu va entamar el primer festival de cultura urbano del conceyu, un eventu pa tolos públicos que se va celebrar nel C.P El Coto.

Dende les diez de la mañana hasta la una de la madrugada L’Entregu va ser un pueblu enllenu de cultura urbano, entiendo esta como aquelles actividaes que se faen na cai socialmente y con daqué arume alternativo. Amás esti festival tamién nagua por apostar pola multicultularidá, amestando nel programa parte de la esencia de Xamaica, del Bronx y d'África; too ello ensin escaecer los raigaños culturales asturianos. Ye por esto que va haber danza africana, un pasucais de los Gaiteros del Carbón, una auténtica sound system –los potentes equipos musicales artesanales y portátiles que nacieron en Xamaica nos años 50-, espectáculu de circu, y conciertos hiphop y reggae con Dani Antistylo, Sebas SBS, K-Nalón, Guaja D y Allanái Soundsystem.

El deporte va tener tamién un papel bien destacáu nesti festival con un tornéu mistu de baloncesto, zona de skateboard y xuegos y deportes tradicionales asturianos. Pa la organización la pata educativa ye fundamental, polo que va haber talleres de pintacares y globofexia, de graffitti y de risoterapia; amás d’una charra alrodiu la cultura sound system.

A la fin, el “I Festival de Cultura Urbano de Samartín” va ser una montonera d'actividaes pa tolos públicos que van ufiertar daqué distinto al conceyu, apostando amás polos artistes y creadores asturianos y de la Cuenca’l Nalón. Una cita autoxestionada pola mocedá y desendolcada tamién gracies al sofitu de los vecinos y de los comerciantes de L’Entregu.


Fabes de Mayo. La collecha del folk máxicu

Redacción
Vienres 25, Setiembre de 2015, 1:00 am

¿Cómo ye eso de que Fabes de Mayo xurde nuna boda?

La formación actual de Fabes de Mayo lleva apenes añu y mediu, anque Fer y Gelu, ambos d’Avilés, entamaron enantes. La nueva versión de Fabes ye verdá que nació dempués d’una boda, el típicu alcuentru de collacios que descubren que toquen l’ukelele y, ¿por qué nun xuntase y tocar xuntos?

Yo (Melanie, contrabaxu, acordión diatónicu), tenía composiciones, Fer (xilófonu, ukelele, guitarra) y Gelu (ukelele) tamién, asina que decidimos aportar caún los nuesos condimentos al platu del otru. A partir d’ehí, les nueves composiciones ficieronse a base d’improvisaciones, llueu xúntaronse a la pota María y César (ukelele) y apaeció la milagrosa Eleanor (acordeón piano). L’oxetivu númberu unu, ye disfrutar del arte y de la maxa de la música que creamos.  Llueu resultó que a la xente prestó-y muncho, y la nuesa euforia foi creciendo, hasta la publicación del nuesu primer discu.

¿Y a qué sabe’l  soníu de Fabes de Mayu?

Muncha xente diznos que nos paecemos bastante a la Penguin Café Orchestra, anque creyo que nengún de nós los conocíemos enantes, o a Yann Tiersen, pero ye difícil definir el nuesu estilu. En realidá creyemos que la nuesa música tien bastantes elementos de la música folk, anque toos tenemos influencies musicales mui diverses, y eso nótase a la hora de componer. Dende’l jazz, la música africana, al Dub, folk más tradicional, la chanson francesa o el math rock, too  amiéstase dalguna manera cuando componemos canciones.

¿ Fabes de Mayu qué nos traen al paladar, qué sensaciones?

Creyo que lo que más nos prestarían tresmitir ye que disfrutamos y lo bien que lo pasamos componiendo y tocando en direutu. A parte d’eso, les nuestres canciones lleven por título dalgunes de les imáxenes o llugares que vienen a les nuestres tiestes cuando les tocamos, pero préstanos que cada persona que la isenta imaxine la so propia historia pa cada canción.

Containos un pocoñín de la vuesa trayectoria

L’escenariu que más nos impresionó, foi’l teatro Valdés d’Avilés cuando tocamos na gala de clausura del festival Avilés Acción non-stop Film Festival. Encantonos tocal nel festival Vericuetos na Munster. Entre los más orixinales, tocamos nun escaparate en EscarparArtes, nun teyau nuna boda, nun tren nel Festival de la Xata la Rifa (repetiremos esti añu, el 3 d’ochobre, nel tren Bilbo-Uviéu). Toquemos en Bélxica, en Francia y casi n’Italia.

¡Xira europea! ¿Qué tal per ellí?

El branu pasáu, díbemos a tocar nun festival n’Italia. Colamos emocionaos con dos furgonetes hasta enriba d’ilusiones. La víspera, toquemos nun pueblu de Llión, Primout. Cerca d’Astorga, la furgo de Fer decidió facer la primera parada… lo malo ye que la parada duró tres diez. Lo típico, el taller tien que pedir pieces, enxaman lleguen al día siguiente, etc…

Analizando la situación, decidimos llevantar los ánimos faciendo lo meyor que dásenos: tocar. Entamamos a tocar nes casi d’Astorga. Cuando nos dieron la furgo, yá yera demasio tarde como pa dir pa Italia. Entós decidimos siguir tocando na cai…y eso llevónos a Burgos, Toulouse, Carcasonne, Narbona, y, última y más bonita parada, Cadaqués. Dempués d’un bolu improvisáu nes cais que vieron a Salvador Dalí veranear, salió un paisanu d’un restaurante, Iñaki, y convidonos a xintar a toos, probablemente la paella más rica que problemos enxamás! Nun podíamos creyer el tratu que nos dieron nesi restaurante, tratáronnos como reis.

¿Cómo va la carrera discográfica?

Pel momentu sólo tenemos un discu que salió en mayu del 2015 (¡nun podía ser otru mes!). La portada fízonosla la gran collacia y artista Bitxo. Tamos agora componiendo pa sacar un segundu discu.

La música n’Asturies… ¿Qué?

Lo que vemos ye un porrón de xente faciendo pero bona música n’Asturies. Xente nuevo con mui buenes idees que ya tan llevando la so música fuera d’Asturies con éxitu, y xente que lleva años faciendo que la música asturiana suene fuera de la tierrina, pero creyemos que falta un pequeñu emburrión de les instituciones a iniciatives como la vuesta pa la creación d’un circuito permanente de música en direutu. Pensamos que ye fundamental apostar pola educación, acercar la música a la mocedá y consiguir que esti momentu nun seya pasaxeru, que siga surdiendo xente con talentu y nueves idees.

¿Y qué ye lo qu’echais de menos na música, cultura y llingua asturiana? ¿Qué necesitamos?

Como comentamos na entruga anterior, necesitamos un poco más d’implicación por parte de les instituciones. Nel casu particular de la música que ye’l que conocemos más de cerca, hai dalgunos músicos mozos que tan apostando por una vuelta a lo tradicional, Antón Menchaca revisando la tonada y dándole una nueva dimensión, Abysal con la so electrotonada…, creyemos que se necesita prestar atención a estos movimientos, ye una oportunidá per interesante p’apoyar la música y la llingua.

Vienres 25, compartiendo con GOSE cartel en La Calleja…

El vienres, tocaremos el repertoriu del nueso primer trabayu discográficu.

Sentímonos mui agradecios y terriblemente arguyosos de participar nos conciertos de Glayíos porque quier dicir que ya formamos parte de la escena musical asturiana, anque nun tengamos lletra, anquen un toquemos folk asturianu. Pero si amamos Asturies, la so cultura, la so música, la so xente, por eso ye un honor representarla nos conciertos. Préstanos la propuesta d’acercar les cultures musicales d’Asturies y Euskal Herria.

Más info en: www.fabesdemayo.com

 


Gose. Folk electro punk dende Euskadi

Redacción
Xueves 24, Setiembre de 2015, 4:18 pm

¿Qué y quienes sois GOSE? ¿Cómo vos presentariais al publicu asturianu?

Entamamos como GOSE nel 2005. Toos veníemos de distintes bandes; Ines (Ekon, Isarevolution, etc…), Osoron (Kañeria 13, Gatillazo, etc…)y yo Iñaki de Bad f-Line. La idea foi xuntar el soníu de la Trikitixa con bases electróniques y guitarres.

Fuimos probando cantares, etc… hasta que grabemos una maqueta de 3 temes que presentemos a Oihuka y equí s’entamó a liar la cosa, saquemos un discu con ellos, llueu pasemonos a l’autoproducción, etc…

El grupu somos 6 persones anque enriba del escenariu tamos 3. Somos Ines (triki y voz), Osoron (Guitarres), Iñaki (Ritmos y secuencies), Josema (Técnicu de soníu), Haritz (Roadie, furgoneta, etc…) y Amaia (Oficina, manager), toes somos iguales, caúna tien el so terrenu y toes somos GOSE. Somos una cooperativa pero de les de verdá non como Fagor..

Con un soníu un tanto particular...

Sonamos a GOSE, ye difícil de comparar con otros grupos pola carauterística tan marcada de la Trikitixa. Llueu los 3 somos mui ”musiqueros”  y préstanos sentir de too, intercambiámonos muncha música, etc…

Los 3 coincidimos en Prodigy, Garbage, Kmfdm, etc… llueu Ines tien el so llau folclóricu, Osoron ye más de punk y yo más de electrónicu. Creo que la gran virtú que tenemos ye que con gustos tan diferentes caún sabe respetar el terrenu del otru y asina enriquece’l  resultáu final.

Importancia de la música y tamién de les lletres a la hora de tresmitir el vuesu mensaxe

Les lletres son per importantes en GOSE. Creyemos que nestos momentos nos que tamos tener un micru na manu con altavoces gordos pa que te puedan sintir ye una suerte qu’hai qu’aprovechar pa dicir un montón de coses. Ye un arma.

Y como nun tan los tiempos pa falar de les flores pues intentamos tresmitir lo que pasa alrodiu, Euskal Herria, Sexu, Policia, etc… a la nuesa manera, baxo’l nuesu puntu de vista.

Nesti sentíu tuvimos la suerte de formar un proyeutu GOSARIAK, xunto a l’escritor Joseba Sarrionandia y los artistas plásticos Iñigo Arregi y Juan Luis Goikolea nel que la mayor parte del pesu del proyeutu recayía sobre los textos. Sarrionandia ye l’escritor de mayor prestixu n’euskera y la verdá ye que foi too un honor facer esi proyeutu xunto a él. Dímonos cuenta de lo importante d’una bona lletra nuna canción y de lo que pue llegar a tresmitir con un bon testu. Increible.

10 años enriba los escenarios da pa muncho...

Si, dende’l principiu el nuesu primer oxetivu foi tocar en direutu, ye lo que nos presta. Teniendo una formación diferente a la de los grupos de rock habituales y con una puesta n’escena distinta, etc… nestos 10 años que llevamos con GOSE, consiguimos facenos un requexu ente punkis, heavys, grupos con trompeta…..y metenos nos conciertos d’Euskal Herria. Facemos una media de 40 conciertos al añu, la mayoria n’Euskadi pero salimos bastante fuera, ficimos xires per Xapón, Estados Uníos, Europa… amás de munchos conciertos per tol Estáu (Catalunya, Madrid, Andalucia, Galiza, etc)… que sólo nos falta tocar n’Asturies y tenemos munches ganes!!!

Y claro, enllenos d'anéctotes supongo

Pasónos de too, dende poner a parir a un famosu cantante brasileñu nun cantar y que l’añu siguiente nos llamara pa llevanos de xira pel Estáu, y acabar siendo collacios.  Facer la canción pa una película’l primer añu d’esistencia de GOSE, tocar nel Muséu Guggenheim, tocar pa más de 50.000 persones en Kurdistán, siendo l’unicu grupu non kurdu del festival parez que-yos prestó y acabamos saliendo con guardaespaldes del recintu pol acosu de la xente.

Ficimos el primer videoclip en 3D n’euskera con Mikel Clemente con “Ezetz”, y consiguimos axuntar a lo “meyor” de la música vasca (Fermin Muguruza, Oskorri, Kutxi – Marea-, Oreka Tx, Gari, etc…) pa que cantasen temes de GOSE nel nuesu cuartu discu, eso foi brutal. Pero lo más importante que consiguimos ye facer 5 discos y siguir con ganes de facer más coses.

¿Qué pasa con los vuesos discos?, esa manera de distinguilos...

Enxamás ponemos títulu a los nuesos discos, la diferencia ta pol collor de la so portada (Prieto, Blancu, Colorau, Rosa, Naranxa…) un pequeñu homenaxe a Reservoir Dogs y una manera d’evitanos tener que pensar un títulu que garre esi puñau de canciones.

Claro qu’esta idea yera bona cuando creyíemos que nun faeríemos más de 2 discos, agora la cosa complicase… Cada discu reflexa’l momentu nel qu’estamos y lo que nos apeteció facer nesi momentu. Siempre ficímos too a la nuesa manera, ensin presiones y porque prestábamos facelo. El discu “Rosa” del que falaba enantes que consiguimos xuntar a los “Más Grandes”, foi un homenaxe a nós mesmos y tuvimos la suerte de xuntar a tolos que quisimos, naide nos dixo que non. Lo que nos paeció increíble.

Tolos discos grabemoslos, editemoslos y produxímoslos nós mesmos, lo que significa munchísimu trabayu y pal últimu discu quisimos dexar la producción n’otres manes, buscando otra perspeutiva, otru puntu de vista nel soníu y nes canciones y asina tratemos con Spam (Madrid) pa que nos lo produxera y la verdá ye que tamos encantaos. Dexónos centranos más na propia canción y despreocupanos del soníu, de les mezcles etc…

¿Cómo ta la escena musical nel vuesu entornu?

La escena musical ta gacha. Hai milenta bandes pero poques bandes de xente mozo. La mocedá nun quier tocar nun grupu, agora quieren ser Dj’s o pasen de too direutamente. Demasiada PlayStation y poques guitarres, creo yo. La mayor parte de grupos interesantes lleven más de 10 años tocando o los sos miembros tienen más de 30 años. Lo que ye esmolecedor enforma. Amás creo que falta una de les carauterístiques  más interesantes del rock, la mala hostia. Quiero pensar que too esto ye’l frutu del momentu que vivimos y que ye pasaxeru, si non vamos realmente mal. N’Euskal Herria onde enantes había punk y mala hostia agora hai grupos con trompetes cantando a les flores o un dj de radio fórmula… lo que m’esmolez.

La música, cultura y llingua asturiana necesita…

Ye cuestión de actitú y ilusión. Creer no que faes y a muerte con ello. Sólo eso.

Bueno, mañana  vienres 25 de setiembre n'Uviéu,  en La Calleja…

Tenemos munches ganes d’estrenanos n’Asturies. Ines collaboró va un par de años con La Tarrancha pero enxamás fuimos a tocar per ehí y apeteznos muncho.

Creo que l’intercambiu ente los pueblos pequeños ye fundamental pa danos a conocer. Y tanto Asturies como Euskal Herria tenemos munches coses que glayar. L’intercambiu enriquez.

Munches vegaes empeñámonos en dir a Europa cuando nun conocemos el pueblu que tenemos al llau y ye un grave error. Amás la lluvia y el fríu únenos y eso marca pa siempre.

Pa zarrar la entrevista queréis que se sienta…

A nós préstanos tolos nuesos cantares, ensin esceición. Asina qu’escoyer vosotres, que por nós pondríais toes una  detrás d’otra.


Entama'l ciclu d’intercambios musicales Glayíos/Oihuak

Redacción
Xueves 29, Xineru de 2015, 3:55 pm

Skama la Rede y Skakeitan abren esti sábadu na Sala Whippoorwill el ciclu d’intercambios musicales Glayíos/Oihuak

Los promotores d’esta iniciativa pionera presentaron el primero de los cinco conciertos y la innovadora fórmula de xestión cultural del proyectu

Música en movimientu, pueblos moviéndose. El llema ye’l reflexu de Glayíos/Oihuak, una iniciativa asociativa xuvenil pa sofitar a bandes asturianes y vasques lloñe de la so tierra. Acullá de la música, ye un proyectu que-y da puxu a un modelu nuevu de xestión cultural basáu na cooperación, l’autoxestión y la tresmisión de principios. Esti sábadu 31 ye la primera puesta n’escena col conciertu de los asturianos Skama la Rede y los donostiarres Skakeitan.

 “Ye necesario esportar la música asturiana”. Les pallabres de Xicu Ariza parten de la crítica a “la carencia d’infraestructures y l’ausencia de polítiques culturales” que causen “dificultá pa desendolcar proyectos musicales estables quedándose namás n’Asturies”. D’esta miente Ariza destacó’l llabor desendolcáu con Ixuxú nos sos dos años de vida y apuntó qu’esti ye un nuevu pasu: “Intercambiar bandes asturianes y vasques que son mui conocíes nel so ámbitu, pa que cooperen y cadúna aproveche la relevancia que tien la otra nel so territoriu”. Too ello afitando “un circuitu estable con conciertos de calidá cada dos meses y a precios accesibles”.

 

Con principios

“Amás de qué queremos facer ye mui importante cómo facelo”. Miguel Rodríguez sorrayó la filosofía del proyectu destacando’l dar un “tratu cercanu, tresparente y horizontal ente grupos y promotores”. Ente otros principios defendió’l calter non llucrativu y xuvenil: “Creemos en l’autoxestión dende la mocedá porque la xente mozo tien qu’empezar a dar alternatives a lo que vien establecío dende’l sistema”; y resaltó’l llabor social del proyectu. Nesti sen, distintos colectivos solidarios y culturales van tar nel conciertu dando a conocer el so trabayu.

Rodríguez sorrayó tamién el papel de los patrocinadores. “Somos xóvenes -la mayoría al paru- y pa financiar el proyectu busquemos unos sofitos colos que compartiéramos filosofía”. Glayíos/Oihuak ta apoyáu por doce axentes -instituciones, pequeñes empreses y medios de comunicación- colos que se compartan principios: “La defensa de la cultura y la lingua, la economía social o que faigan un llabor d’espardimientu de la música del país”.

 

Importante xera

“El trabayu que faen estos mozos deberíen de facelo les instituciones publiques porque tán pa promocionar la cultura y la música propia del país. Pero seguramente nun lo faedríen ni la metá de bien de como lo ta faciendo esta xente”. Na so intervención,  Miguel Fernandi ‘Burilo’ animó a la mocedá a que “tome la iniciativa de facer coses” y reconoció qu’esti proyectu facilita la xera de los grupos a la hora de tocar fuera. 

Amás agradeció’l calter colectivu y cooperativu: “nadie s’aprovecha de nadie; grupos y organizadores vamos toos a comuña.”

El cantante de Skama la Rede tamién recordó que Skakeitan y el so grupu yá compartieron escenariu l’añu pasáu nel desagospiáu CSOA La Madreña, naguando por que, como aquella vegada, “oxalá se vendan toles entraes”. Los dos grupos van abrir Glayíos/Oihuak Música en Movimentu a ritmu ska pa presentar los sos nuevos trabayos ‘Avante’ y Orekariak’. Les entraes pueden mercase anticipada a cinco euros –doce con discu d’un de los grupos-, y por ocho euros el sábadu 31 dende les 21.30 na puerta de la Sala Whippoorwill.

skama la rede. ska-punk-folk. peñes-villaviciosa

Es una de las bandas más destacadas de la segunda generación del “rock astur” (movimiento musical del que son padres grupos como Dixebra o Los Berrones). Llevan desde el 2003 en activo con una trayectoria ascendente e imparable gracias a un directo enérgico y a su estilo personal, caracterizado por mezclar ska, folk asturiano y punk-rock. En julio de 2014 publicaron su cuarto disco ‘Avante’, doce canciones con las que superan la madurez.

www.skamalarede.com - fb/skama.larede - @skamalarede

 

skakeitan. ska-rock. donostia-san sebastián
Al rodiu de 70 conciertos en solo dos años -ente los que ta el tocar con Manu Chao ente 60.000 personas-, estos donostiarras son yá muncho más que la nueva promesa del ska-rock vasco. Vitalidá, frescura, calidá y muncha fuerza nestos herederos de clásicos del rock combativu y de la música xamaicana (Mano Negra, Rancid, Skalariak, Jimmy Cliff...). ‘Orekariak’ ye'l so su segundu discu; Glayíos/Oihuak la so primer puesta n'escena fuera de Euskal Herria.

www.skakeitan.bandcamp.com - fb/skakeitant - @skakeitan_band


L'Anuariu de la Música Asturiana repasa l'actualidá musical del últimu añu

Xune Elipe
Llunes 19, Xineru de 2015, 12:11 pm

Un añu más l’Anuariu de la Música Asturiana, publicáu por Goxe Producciones, fai alcordanza de l’actividá producida nel últimu añu dientro del campu de la música d’espresión asturiana: la tradicional, aquella que la reellabora (folk y demás derivaos) y la qu’utiliza l’asturianu independientemente del estilu. Son yá dieciséis los años nos qu’esta publicación, siempre per estes feches, ve la lluz y trata fondamente temes y cuestiones rellacionaos cola nuestra música.

L’Entamu d’esti númberu, tituláu «La voluntá de ser y siguir de la música asturiana», firmáu pol so director, Xune Elipe, fala de la trayectoria de la publicación y comenta: «Echando una güeyada a los anteriores númberos vemos cómo, por desgracia, poco de lo que se propón nellos se fixo realidá, sobre too no que se refier al deséu d’una verdadera política musical por parte del Gobiernu d’Asturies, que sigue ensin da-y l’atención afechisca a esti sector, con acciones insuficientes, tímides y ensin continuidá, sacante dalguna escepción honrosa, como la creación del Premiu al Meyor Cantar. Nesti sen, siguimos naguando por eses llinies d’actuación de los poderes públicos que lleven al oxetivu final de llograr visibilidá (interior y esterior), estabilidá y profesionalidá a esta rama de la industria cultural nel nuestru país».

Tocántenes al restu de conteníos, apaecen dos informes titulaos «Cómo montar un festival y nun morrer nel intentu» y «Nuevu folk asturianu», reportaxes como «Música, televisión y neños», cróniques sobre’l III Sol Celta d’Avilés y el Premiu al Meyor Cantar 2014, entrevistes a Tejedor, Skama la Rede, Borja Baragaño y Os Folkgazáis, recoyida de material como «La historia del gaiteru y el conde ganaderu» o artículos d’opinión; amás na sección Collecha apaecen toles producciones discográfiques, bibliográfiques y audiovisuales, relatives a la música asturiana, del añu 2014. Como ye vezu, l’A.M.A. inclúi como complementu un discu resume de los álbunes publicaos nesi tiempu, con dieciséis temes separtaos por estilos: tonada, folk, bandes de gaites, canción d’autor y rock.

 

L’Anuariu de la Música Asturiana 2014 pue consiguise nos puntos de venta que vienen darréu: Uviéu (Chigre L’Esperteyu y Tienda de Comerciu Xustu L’Arcu la Vieya), Xixón (Trisquel, Centru Social La Semiente, Llibrería Paradiso y La Revoltosa), Avilés (El Cafetón y El Cabanón), Candás (Llibrería Palabras de caramelo), Mieres (L’Abellugu y Habana), Villaviciosa (La Esbilla y Ringo Rango) y Santu Adrianu (El Sabil).


1 | 2 | Siguiente » | Última »»

Últimas
Al azar

Hemeroteca

Buscador